“Sehrli” göbələklərdə tapılan psixodelik birləşmə kimyaterapiyanın səbəb olduğu ağır sinir zədələnməsinin və ağrının qarşısını ala bilər

Kimyaterapi saysız-hesabsız insan həyatını xilas etsə də, o, çox vaxt ətraflarda sinir zədələnməsi də daxil olmaqla, zərərli yan təsirlərlə müşayiət olunur. Periferik neyropatiya adlanan bu ağrılı vəziyyət əl və ayaqlarda uzunmüddətli keyimə, qarışqa gəzməsi hissi və hərəkət problemlərinə səbəb ola bilər.

Lakin sentyabrın 3-də "Science" jurnalında dərc olunan bir araşdırmaya görə, "sehrli göbələklər" adlanan maddələrin tərkibindəki psixodelik birləşmə sinir zədələnməsinə qarşı qoruma təmin edə bilər. Tədqiqat göstərib ki, siçanlara kimyaterapiyadan qısa müddət əvvəl cəmi iki doza psilosibin vermək heyvanlarda ağrıya qarşı həssaslığın yaranmasının qarşısını alıb.

Nəticələr o qədər ümidvericidir ki, tədqiqatçılar bu il orta mərhələli klinik sınaqlara başlamağı planlaşdırırlar. Hazırda xəstələrin 70 faizinə qədərinə təsir etdiyi təxmin edilən kimyaterapiya nəticəsində yaranan periferik neyropatiya üçün profilaktik və ya digər növ effektiv müalicə üsulu mövcud deyil.

İngiltərənin Redinq Universitetinin farmakoloqu və araşdırmada iştirak etməyən Maria Maiaru "New Scientist"dən Karissa Vonqa deyib: "Əgər bu tapıntılar klinik sınaqlarda təkrarlana bilsə, nəticələri çox əhəmiyyətli ola bilər. Xəstələr xərçəng uğurla müalicə olunduqdan sonra da çox vaxt qalan uzunmüddətli duyğu problemlərindən və xroniki ağrılardan qaça bilərlər".

Nəticələrlə bağlı keçirilən mətbuat konfransında tədqiqatın həmmüəllifi, Texas Universitetinin M.D. Anderson Xərçəng Mərkəzinin cərrahı və neyroelm alimi Moran Amit kəşfin necə gözlənilməz olduğunu izah edib. Onun laboratoriyasındakı bir tədqiqatçı kimyaterapiyadan əvvəl psilosibin qəbul edən siçanlarda sinir zədələnməsi əlamətlərinin olmadığını bildirib.

"New York Times"dan Endryu Ceykobsun məlumatına görə, o, tədqiqatçıya "Sənə inanmıram. Bunu yenidən et" dediyini xatırlayır.