Sahibkarlarla bankları vahid kredit bazarı vasitəsilə birləşdirən “Tadbircore.uz” platforması dekabrın 1-dən süni intellektə əsaslanan alternativ skorinq sistemini işə salmağı planlaşdırır. Bunu Trend-in xüsusi müxbirinə Tədbircore.uz-un direktor müavini Oybek Aşurov Taşkda keçirilən İpək Yolunun Maliyyə və Texnologiya Forumu çərçivəsində deyib. Onun sözlərinə görə, yeni sistem təkcə potensial borcalanları qiymətləndirməyəcək, həm də sahibkarlara mümkün kreditdən imtinanın səbəblərini anlamağa və təkmilləşdirməyə ehtiyacı olan sahələri müəyyən etməyə kömək edəcək.
"Biz sahibkarlarımıza öz çatışmazlıqlarını başa düşmək üçün süni intellektdən istifadə edəcəyik: onlar niyə qiymətləndirmədən keçə bilmirlər, niyə kredit ala bilmirlər və nə etmək lazımdır", - Aşurov bildirib. Onun sözlərinə görə, sistem dələduzluğun qarşısının alınmasını da nəzərə alacaq və bankların nəzarət mexanizmlərindən yan keçmək üçün əlavə imkanlar yaratmamalıdır. Tədbircore.uz artıq 72 rəqəmsal informasiya kanalı vasitəsilə 22 nazirlik və dövlət qurumunun məlumatlarını birləşdirərək banklara kredit müraciətlərini qiymətləndirərkən sahibkarlar haqqında daha dolğun məlumat əldə etməyə imkan verir.
"Biz sahibkar haqqında tam təsəvvür əldə edirik. Əvvəllər heç yerdə belə platforma olmayıb", - Aşurov bildirib. Platforma həmçinin kredit müraciətlərini bankların kredit məhsulları ilə uyğunlaşdırır.
Hazırda onun 23 iştirakçı bankı var və ilin sonuna qədər bu rəqəmin 35-ə çatacağı gözlənilir. “Sahibkarın üç gün ərzində bürokratiyaya yol vermədən vahid pəncərədən müraciət edib cavab alması rahat olacaq, çünki bütün sənədləri özümüz toplayıb banklara göndəririk”, - Aşurov bildirib. O bildirib ki, pilot layihənin icrasına iyunun 11-dən start verildiyi gündən platforma vasitəsilə sahibkarlardan 5700-ə yaxın müraciət daxil olub, onlardan 826-nın krediti təsdiqlənib.
Tədbircore.uz-un inkişafının növbəti mərhələsi onun distant bank xidmətləri spektrinin genişləndirilməsini əhatə edəcək. Platforma istifadəçilərə hesablaşma, depozit, tranzit və terminal hesabları daxil olmaqla müxtəlif banklarda məsafədən hesablar açmağa imkan verməyi planlaşdırır. Gələn ay ərzində mobil tətbiqetmənin də istifadəyə verilməsi gözlənilir.
Aşurov bildirib ki, onun ilkin funksionallığı mobil cihazlarda rəqəmsal imzadan istifadənin xüsusiyyətlərinə uyğunlaşdırılacaq. O, əlavə edib ki, Tədbircore.uz nəhayət Özbəkistandan kənara çıxa və platformanı digər Mərkəzi Asiya ölkələrində də inkişaf etdirə bilər. Mənbə: https://www.trend.az/casia/uzbekistan/4218730.html © 2026 Trend İnformasiya Agentliyi.
Xülasə — davamını mənbədə oxuyun.
