Tbilisidə Azərbaycanın Xalq şairi Mirvarid Dilbazinin anadan olmasının 114-cü ildönümünə həsr olunmuş xatirə tədbiri keçirilib. "Report"un Gürcüstan bürosu xəbər verir ki, tədbir Tbilisidə M.F.Axundzadə adına Azərbaycan Mədəniyyəti Muzeyində təşkil olunub. Tədbirdə Mirvarid Dilbazinin yaradıcılığından, Azərbaycan ədəbiyyatındakı xidmətlərindən və onun zəngin irsinin gələcək nəsillərə çatdırılmasının əhəmiyyətindən söz açılıb.
Çıxış edən Mirvarid Dilbazi Poeziya Məclisinin rəhbəri, "Azərbaycan Milli Kəlağayı Evi"nin direktoru, tədqiqatçı Güllü Eldar Tomarlı bildirib ki, Xalq şairinin yaradıcılığı Azərbaycan sərhədlərini aşaraq dost ölkələrdə də tanınır və onun əsərləri gənc nəsil tərəfindən maraqla qarşılanır. O qeyd edib ki, Mirvarid Dilbazinin yaradıcılığı gələcək nəsillər üçün mühüm mənəvi örnəkdir. Tədbir çərçivəsində Mirvarid Dilbazi Poeziya Məclisinin təşəbbüsü ilə yenidən nəşr olunan "Bənövşələr üstə göz yaşı" kitabının təqdimatı da keçirilib.
Təqdimat zamanı kitabın dövlət qurumlarına və kitabxanalara hədiyyə edilərək oxucuların istifadəsinə veriləcəyi bildirilib. Qeyd edək ki, xatirə tədbiri Mirvarid Dilbazi Poeziya Məclisinin təşkilatçılığı, M.F. Axundzadə adına Azərbaycan Mədəniyyəti Muzeyinin dəstəyi ilə baş tutub.
Xülasə — davamını mənbədə oxuyun.
