97. sevgisiz günlük, günlər ağır keçir. nə etsəm də *kassir qız*ı ağlımdan çıxara bilmirəm. yuxularıma belə girməyə başlayıb. film izləməyə çalışıram, ancaq fikirlərimdə özümü tam olaraq filmə verə bilmirəm. elə indi terminator 2'ni izləyirdim, yarıda saxlayıb bu entryni yazıram. sözlükdən bir dost mənə qızla danışmağı məsləhət gördü, amma deyim ki, bu mümkün deyil. keçən dəfəki bərbad təcrübəmdən sonra hələ bunu heç vaxt etmərəm. bir filmdə görmüşdüm, qız oğlanı dəfələrlə rədd edir. oğlan səbəbini anlamasa da əslində səbəbi oğlanın çirkin olması idi. özümlə barışmışam artıq bəli, çirkinəm, cılızam, zəifəm, qorxağam. həmin qıza layiq biri deyiləm, bunu anlayıram. o, daha yaxşılarına layiqdir. həm də onun məni xoşladığına inanmıram. mənə 4-5 saniyəlik təbəssüm etməsinin səbəbi mənim çox zaman danışmamam və ya çox alçaqdan danışmağım ola bilər. həmin vaxt ucadan söz demiş ola bilərəm, bu da qızda təbəssüm yarada bilərdi. məni görəndə təbəssüm etməsi, mənə baxması bəlkə də mənim görmək istədiyim şeydi, amma real deyildi. yəni, həmin anlarda o, başqa bir şey düşünürdü, bəlkə də. dünən (ayın 3'ü) marketə getmədim, bilmirəm niyə. ondan bir gün qabaq gedəndə kassada yox idi amma mən digər kassada olanda bir anlıq yenə göz-gözə gəldik. gözümü həmən qaçırdım. yanımdan cəld keçdi, harasa tələsirdi deyəsən. düzü söz versəm də ki, bir daha o marketə getməyəcəm özümü saxlaya bilmirəm. onu görəndə sanki özümü çox qəribə hiss edirəm. ona aşiq olmuşam. ancaq nə etmək olar, bəzi eşqlər mümkünsüz olur. bilmək olmaz, bəlkə gələcəkdə yolumuz yenə kəsişdi? onsuz da 10 gün sonra gedirəm və yəqin ki, 10 gün sonra onu bir daha görə bilməyəcəm. amma söz verirəm ki, onu unutmayacam; toxunaraq mənə verdiyi bir neçə çeki də saxlayıram. kassir qız həyatımda silinməz iz qoydu. kaş onunla fərqli bir yerdə, fərqli bir zamanda üz-üzə gələrdim, bəlkə o zaman ikimizdə xoşbəxt ola bilərdik...