54. burda əsgərliyin pis cəhətləri ilə razılaşardım. əgər əsgərliyə getməsəydim.

28 mayda qatara minəndən sonra anlayırsan ki, hər şey bitdi. həyatın yeni bir mərhələsi başlayır. qatarda peşman olmuşdum, özümü "yararsız" etmədiyimə görə. səhər hərbi hissəyə çatdıq. mənim kimi yüzlərlə adam var idi. ilk dəfə kazarmaya girəndə, corab, tər iyinin qarışığını hiss edəndə peşman olmuşdum, özümü "yararsız" etmədim deyə. elə həmin gecə kravatın altında siçanların səsini eşidəndə peşman olmuşdum. səhər yuxudan durub natəmiz tualetə gedəndə peşman oldum. formalarımızı ora gedəndən üç gün sonra verdilər. o vaxta qədər mülki formada gəzdik. mülki formamızı gözümüzün qabağında yandıranda peşman olmuşdum. ilk üç ay dənizin qırağında yerləşən hərbi hissədə olmuşdum. hər səhər dənizdə azad bir şəkildə balıq tutanları görəndə peşman olmuşdum "yararsız" etmədiyimə görə.

sonra dedim ki, bu qədər peşmançılıq yetər. digər əsgərlərlə münasibətə başladım. əlaqəm olmayan uşaqlıq dostumu əsgərlikdə tapanda, dedim ki, yaxşı ki gəlmişəm. kazarmada gecələr dönər, pizza, lahmacun zakaz edirdik. hasardan bizə atırdılar. bizdə pulu atırdıq. dostlarım artırdı. axşamlar dənizin qırağında oturub, dostlarımla etdiyimiz söhbətlər, gülüşmələri xatırladıqca, "yaxşı ki, getmişəm" deyirəm. poliqonda 64 güllə və 4 qumbara ataraq o hisləri yaşayanda adam deyir ki, "yaxşı ki, həyatımda bunu da yaşadım". bu sizə adi görünə bilər, amma verdiyi hiss əladı. gecələr kazarmada yatmırdıq, söhbət edirdik. cavabdeh gələndən gələnə özümüzü yuxuluğa vururduq.
molodoyluqdan sonra bölünmələr başlayanda ən pis anları təzədən yaşadım. dostlarımdan ayrı düşmüşdük. hər şeyə yenidən başlama lazım gəlirdi. yeni getdiyim hərbi hissədə yeni əsgərlərlə tanış olmaq falan. postda keçən yuxusuz gecələr.

apreldə ölümə yaxın olanda təzədən peşmançılıqlarım başladı. tanıdığım əsgər yoldaşların ölüm xəbəri gələndə, peşman oldum. indi isə burdayam. keçmişə baxıram. 7 aydı ki, qayıtmışam. itirdiyim sadəcə o döyüşlərdə ölən əsgər yoldaşlarım oldu. qazandıqlarım isə... özümü qazandım. nələri bacara biləcəyimi anladım. ən çətin anlara belə dözəcəyimi anladım. indi fikirləşirəm o əziyyətləri. üzümə təbəssüm qonur. çünki heç bir çətinliyin mənə nəsə edə bilməyəcəyini anladım.

ilk üç ayı tələbəlik illəri kimi olan bir şey. kazarmanı tələbə yataqxanası hesab edin. maxe qızlarını da texnikumda qarşınıza çıxan tək-tük qızlardan hesab edin. (çox qəşəng olurlar. fiziki cəhətdən yaxşı vəziyyətdədirlər). həmçinin son bir ayınızı, köhnə həyatınızın bitib yeni həyata başlayırmış kimi hiss edəcəksiz. həmçinin əsgərlik rejimi çox sağlam bir rejimdi. 56 kilo getmişdim, 70 kilo qayıtdım..
yararlı olanların getməli olduğu yerdir.