65. iyulun 8-i gedib, hal-hazırda andiçmə mərasimindən sonra buraxılışda olduğum üçün bu entry'ni yaza bilirəm.
Hələ 1 ayın əsgəri olsam da sanki 1 il keçmiş kimi gəlir. öz evimdə deyiləm hələ də, naxçıvandayam. Buraxılışda kəndə getdim. Özümü qəribə hiss edirəm, sanki nəsə çatışmır. Bu buraxılış deyilən şey yarımçıq azadlıqdır. Çünki bilirsən ki geri dönəcəksən bir neçə gün sonra. ona görə də özünə yer tapa bilmirsən. Buraxılışdan qabaq düşünürsən ki mülkiyə çıxsam onu edəcəm bunu edəcəm amma heç nəyin dadı yoxdur, ümumiyyətlə heç həvəs yoxdur nəsə etməyə. Çox pis haldır bu.
6-7 il bundan qabaq bibioğlum əsgərlikdən təzə gələndə ondan soruşmuşdum ki, bəs əsgərliyin mənası nədir; "mülki həyatın qədrini bilirsən" cavabını vermişdi mənə.
Kim deyirsə ki, əsgərlik vətəni qorumaq üçün təşkil edilmiş bir şeydir, yalan deyir. Burda ancaq rütbəlilərə xidmət edirsən.
Düşünürəm ki şablon və çox bilinən məlumatları yazmağın mənası yoxdur.
1 aydır telefonum sönülü idi, həvəslə açıb mesaj zad gəlməsini gözlədim amma heç azercelldən belə mesaj gəlmədi. dost tanışım yoxdur, bunu qəbul etmişəm amma adam yenə də gözləyir nəsə. Anama zəng etdim, ağlayırdım ara sıra ancaq mümkün qədər səsimi normal saxladım. indiyənə kimi 10 dəqiqədən artıq telefon ilə danışmayan mən 40 dəqiqə danışdım. insan sevdiklərinin dəyərini anlayır ay canım gözüm sözlük. Bəzən olurdu anam zəng edəndə açmırdım ya da tez bazar danışırdım, ancaq indi günlərlə danışmaq istəyirəm.
Kaş insanlarla daha yaxşı münasibət qura biləydim, universitetdə dostluqlar yarada bilərdim; indi tək qalmazdım bəlkə də. Ancaq özümdən asılı deyil, bacarmıram.
Adama qoyan şey sadəcə səndən aşağı səviyyəli ancaq rütbəcə üstün şəxslərdən gic gic əmrlər almaqdır. Höte'nin bir sözü var: "dəyəri yüksək olan şey heç vaxt dəyəri az olanın mərhəmətinə sığınmamalıdır." Zabitlərin əksəriyyəti cahildir, sanki cahillik burada kök salıb, meyvə verib elə bil. Elə əsgərlər var ki oxuma yazma bilmir. Əşi nəsə boş verin hərbi xidməti, əgər nə vaxtsa xidmət etmək fikriniz varsa, eləməyin yazıqsınız.
Sonda mənimlə maraqlanan bütün yazarlara təşəkkür edirəm, sağ olun. Çalışıb yola verib sağ salamat geri qayıdacam. Yaman günün ömrü az olur nədə olsa.