397. sözaltı sözlük mənim üçün nədir?

sözaltı sözlük mənim üçün bir məqsəddir. fikir inqilabıdır. fikirlərin çarpışdığı müasir dünyada cəmiyyətimiz üçün əhəmiyyətli olduğunu düşündüyüm sözlükdür. sözaltı sözlük bir zərrədir, və ətrafını dəyişməyə qadir olan potensiala sahibdir. kimyada reaksiyaların başlaması üçün çox əhəmiyyətli olan zərrəciklər var. məsələn su donma temperaturuna çatanda, kristallaşma əvvəlcə molekulları ətrafına yığma potensialı olan xüsusi zərrəciklərin ətrafında başlayır. və xüsusi donma mərkəzlərinin ətrafında kristallaşma yayılır və bütün su donur. kiçik zərrəciklər bütün sistemi dəyişə bilirlər. mənim üçün sözaltı sözlük həmin o kiçik zərrəciklərdəndir. bu gün iki yaşı oldu. hələ balacadır. böyüyüb bütün sistemə - cəmiyyətə təsir edəcək səviyyəyə çatması üçün bu gün burdayam. bəzən bəziləri deyir ki, ne var e orda çoxu ateistdi, yığışıblar boş-boş danışırlar. amma mən bu gün burdayam çünki gələcəkdə bütün cəmiyyətə təsiri ola biləcək potensiala dəstək olmaq istəyirəm. o potensial ki, insanlara fərqli düşünməyi öyrədəcək. fərqi yoxdu, səhv ya düz olsun, əsas odu ki, insanlar düşünməyi öyrənsinlər. bu gün bizim cəmiyyətin ən böyük problemi odur ki, insanlar düşünməyi bacarmırlar. sözaltı sözlük bu cəmiyyətin içinə düşmüş kiçik bir zərrədir. şübhəsiz, onun ətrafına düşünmək istəyən, düşünməyə çalışan insanlar yığışacaq yavaş-yavaş.