30. islahatçı hökumət heç zaman populyar ola bilmir, çünki oturuşmuş münasibətləri kökündən dəyişməli olur. islahatçı hökumətin ömrü az olur - 5 ildən sonra yenidən seçilməsi ehtimalı yüksək olmur. odur ki, ictimai rəy problemini və zaman azlığını nəzərə alaraq, mən, şərti olaraq, "sağ avtoritarizm" adlandırdığım yollara əl atılmasını önəmli sayıram. bunu bəzən hazır həqiqət, ya da son məqsəd hesab edənlər oldu. hərçənd, ölkəmiz üçün demokratiyanı arzuladığımı dəfələrlə demişəm. burada təkrarlanmaq istəmirəm. sadəcə, ortaya qoyduğum mövzuya başqa bucaqdan baxmanızı arzulayıram.
islahatçı hökumət çevik və sərt olmalıdır. uzun-uzadı müzakirələrə vaxt itirmək - böyük bir tarixi yanlışlıq olardı bizim üçün. müzakirələri hakimiyyətə gələnə qədər aparmaq lazımdır ki, hakimiyyətə gələndə nə etmək istədiyini yaxşı biləsən.
demokratiya nə vasitədir, nə də məqsəd. demokratiya - sosial-iqtisadi inkişafın yan təsiridir. demokratiya demokratik yolla qurula bilmir. demokratiyanın davamlılığı üçün gərəkən təsisatların özü mahiyyət etibarilə demokratik deyil. örnəyi, təhsil, elm və mədəniyyət - meritokratik, icra hakimiyyəti - bürokratik, polis və başqa hüquq-mühafizə qurumları - avtokratik, məhkəmə - inkvizitor, maliyyə sistemi - oliqarxik, ordu - militaristikdir, və s. bu qurumları demokratik yolla islah etmək olmur, çünki onlar ictimai rəydən və onun təzahürlərindən asılı deyil. ən vacibi - bu qurumların mahiyyəti islahatdan sonra dəyişmir. yəni, onlar islah olunandan sonra da demokratik olmur, ola da bilməz.
demokratik təsisatlar - seçkilər, referendumlar, bələdiyyələr, parlament, prezident, media və s. (bir sözlə, siyasi təsisatlardır). "siyasi" dedikdə, ictimai rəydən hər hansı şəkildə asılı olan təsisatları nəzərdə tuturam. bu təsisatların tezliklə işə salınması önəmi mübahisələndirilmir. iqtisadi azadlıqları da buraya aid edirəm.