40. sado-mazoxist ayrılıq şeiri

anti-şeir

bir az dəlilik elə,
bir az qaralt qanımı.
paltarları qarışdır,
vur, sındır fincanımı.

dönüb arxaya baxma
min taksiyə, çıxıb get.
acizləşmə, ağlama
dişlərini sıxıb get.

qayıtmağı düşünmə,
bu gediş son gedişdi.
əlvida-zad söyləmə,
bu çox axmaq vərdişdi.

bir az qürurun olsun,
belə baxma, sərt danış.
məni yumşaldan deyil,
bu ah-nalə, yalvarış.

məndən nigaran qalma,
yaşayaram birtəhər.
ağlamağa çalışma
səni boğmasın qəhər.

evə bir az əl gəzdir,
mətbəxi də süpür, get.
ürəyin soyumasa
gəl üzümə tüpür, get.

yaxşı, daha uzatma,
bir şillə çək üzümə.
bəlkə bir az tək qalıb
gələ bildim özümə.

beləcə razılaşaq
nə sən ağla, nə də mən.
ayrılaq,
bitsin hər şey
sakit,
səssiz,
dinmədən.