83. ekspert dərinə, hüquqşünas düzünə, siyasətçi eninə düşünməlidir. mən hüquqşünasam, ekspert kimi çalışdığım zamanlar da olub. indi də siyasətçi olmağa çalışıram. açıq deyirəm - bu üç düşüncə yönünü bir ağılda barışdırmaq çox çətindir (guman ki, heç mümkün deyil). görünür, linqvistik problemlərlə yanaşı, qəliz yazmağımla bağlı iradların açıqlanmayan kökü düşüncə yönlərini gözləntilərə uyğun dəyişdirə bilməməyimdədir. məndən hüquqşünas rəyi gözləyənlər mövzuları siyasiləşdirməyimdən, siyasi mövqe gözləyənlərsə işə hüquqi yanaşmağımdan gileylənirlər. barışmaz gözləntilər arasında boşluğu (uçurumu) adlamaq üçün ideoloji mübahisələrə girməyin öz faydası olur. ideoloji yanaşma, bir çətir kimi, çeşidli düşüncə yönlərini altına ala bilir. amma bunun nəticəsində düşüncə dərinliyini qurban vermək lazım gəlir. intellektuallıqdan siyasətə girməyin ən ağır və ağrılı tərəfi buradadır.