104. tarif şurasının ölkədə dövlət tərəfindən tənzimlənən qiymətləri təyin etməsi düzgün ( leqal) olsa da (belə bir səlahiyyət ona rəsmən verilib), doğru ( legitim) deyil. tarif şurasını prezident formalışdıdır və bu qurum ancaq prezident qarşında hesabatlıdır. şuranın bütün fəaliyyəti parlament nəzarətindən kənarda qalır.
tarif şurası, qiymətləri təyin etməklə, iki önəmli məsələdə konstitusiyanı pozur: 1) vətəndaşların üzərinə əlavə maliyyə yükü qoyur (qiyməti artıranda), ya da həmin yükü azaldır (qiyməti azaldanda); 2) dövlət büdcəsinin gəlir hissəsinə dolayısıyla dəyişiklik edir (çünki, büdcə əvvəlki qiymətlərə görə hesablanmışdı).
bu iki məsələ milli məclisin müstəsna səlahiyyətindədir. tarif şurası qiymətləri artıranda bir tək vətəndaşların cibinə girmiş olmur, o, həm də qanunverici hakimiyyətə müdaxilə etmiş olur. indiki milli məclis gerçəkdən xalq tərəfindən seçilmiş olsaydı, tarif şurasını ləğv edə, ya da onu özünə tabe etdirə bilərdi.
yuxarıda göstərdiyim iki məsələyə görə, dövlət qiymətlərinin tənzimlənməsi mütləq parlamentin nəzarətində olmalıdır. belə halda, qiyməti artırmağı düşünən deputatlar işin yalnız guman olunan iqtisadi tərəfini deyil, həm də gələcək seçkilərdə seçicilərdən səslərin alınması perspektivini də gözdən keçirməli olacaqdılar. bununla da bazar mexanizmlərilə demokratik prosedurlar arasında tarazlıq qorunacaqdı. indiki durumda onlardan heç biri yoxdur. problem də budur - sistem problemidir. sistemi dəyişmək gərəkdir.