1. ingiliscə internalized racism olaraq bilinən*, insanın öz aid olduğu qrupa qarşı irqçi münasibət bəsləməsi. amerikan cəmiyyətində afroamerikanların arasında mövcud olan, azərbaycanda daha çox orta və varlı təbəqə arasında kifayət qədər geniş yayılmış bir haldır. bir qrupun uzun illər boyu mədəni, siyasi və başqa sferalarda sistematik irqçiliyə məruz qalması nəticəsində, onun üzvlərinin bu mesajları qəbullanması nəticəsində yaranan haldır. uzun illər rus mədəni və siyasi dominantlığı altında qalmış azərbaycanlılar, elə o vaxtdan indiyədək qalan, azərbaycanlıları aşağılama ənənəsini davam etdirirlər. ənənənin başlanğıcını hamının ideallaşdırdığı axundovlara, molla nəsrəddinçilərə qədər uzatmaq olar, amma bu heç də populyar bir mövqe olmaz, çünki illər boyu onların nə qədər toxunulmaz dahilər olduğuna inandırılmışıq. məhz özünü müasir, demokrat adlandıran insanlar bizim üçün bu bütləri tikiblər. heç onlar olmasın, bu ölkənin öz içində azərbaycan dilinin aşağılanması, azərbaycanlıların təhqir olunması heç də uzaq olmayan keçmişdə baş verirdi və çox təəssüf ki, hələ də baş verir. ən məşhur nümunəsi kimi, çuşka konseptini göstərmək olar.