105. sirenalar üçün.
əvvəlcə axşam düşər, sonra mənim ürəyim...
küləklər dənizlərin üzünü qırışdırar.
qapını cırmaqlayar səni görmək istəyim,
səbrimin pişiyini divara dırmaşdırar.
əllərimi yandırar soyuq, quru fotolar
axtararam, tapmaram otağımda ölməyi...
külqabıda dəfn olar siqaretlər, qutular,
qədəhlərə boşalar şüşələrin ürəyi.
mən bu sevgi testini istəmirəm yoxlayım,
qorxuram üç doğrunu silər yalnışın biri.
başın çiynimdə yoxdu, səni necə qoxlayım?
əllərimdə darıxır əllərinin boş yeri...
mən bir az öz-özümdən, bir az səndən gedirəm
mən hamıdan gedirəm gəlib sənə çıxmağa...
hər səhər darıxmağı parça-parça edirəm,
hər gecə qandallanır ürəyim darıxmağa...
əvvəlcə axşam düşür, sonra mənim ürəyim..
qismet rüstemov
(baxma: şair yaradıb da)