16. bu nə darıxmaqdır ay anam, atam?
saatın yerinə darıxır adam.
neçənci ikiyə qalan gecədir?
saatın özündə indi neçədir?
görəsən orada neçənci gündür?
nolacaq bu saat dayansa indi?
nə qədər çətinmiş belə darıxmaq,
beşcə dəqiqəlik bir saat olmaq.
bircə saniyə də duruxmaq olmur
hamı günahını üstünə yıxır.
heç adam kimi də darıxmaq olmur,
səni darıxdığın adamlar sıxır...
bu qədər adamı nə eyləyəsən?
bu qədər sevgini harda boğasan?
bir qələt eyləyib bir gün sevəsən,
bir ömür oturub ona baxasan.
mahnı oxuyasan, şeir yazasan,
işinə-gücünə gəlib gedəsən,
yaddan çıxardasan, yaddan çıxasan,
amma ki, bir şeyi bilib gedəsən:
o da sənin kimi yəqin tək imiş,
o da sənin kimi bir axmaq imiş.
bərabər darıxmaq sevilmək imiş.
bərabər sevilmək darıxmaq imiş.

(bax: raqif raufoğlu)