25. bir səhər yuxudan durub
özünü uşaq görəsən.
görəsən hamı evdədi,
ölənləri sağ görəsən.
…qorxasan qaçıb gedələr, -
tez qapını bağlayasan.
geri dönüb içəridə
bir təzə qonaq görəsən.
görəsən ki, qapqaradı
o qonaq başdan ayağa.
ondan başqa hamısının
üst-başını ağ görəsən.
pəncərədən içəriyə
dola, dola gün işığı.
içəridə boş-boşuna
yanan bir çıraq görəsən.
söndürəsən o çırağı -
hamı birdən yoxa çıxa....
otaqda bir qara qələm,
bir də ağ vərəq görəsən..