26. nə qədər gözəldir səni tanımaq,
yaxşı ki, beləsən, elə bu cürsən.
yağış yağan kimi unudulursan,
yağış yağanda da yada düşürsən.

nə qədər gözəldir sənli yuxular,
səhərin peşiman oyanmağı yox
lazımsız sözlərin və söhbətlərin,
mənasız-mənasız uzanmağı yox.

nə qədər gözəldir belə darıxmaq,
məktubu ünvansız yazırsan gedir.
nə qədər gözəldir belə karıxmaq,
hara istəyirsən yozursan gedir.

nə qədər rahatdır belə yaşamaq,
istəyəndə varsan, istəyəndə yox.
hər gün bitdi demək, hər gün başlamaq,
əlavə izahat istəyən də yox.

nə qədər rahatdır yanına gəlmək,
vaxıtmı da boş-boş almayacaqsan.
nə qədər, nə qədər gözəldir bilmək,
yoxsan, olmamısan, olmayacaqsan.