21. Uzunsaç səbir, dözümlülük, qətiyyətlilik və əsilzadəliyin tərənnümürüdür. Sonuncusu doğrudan da əsilzadəliklə əlaqəlidir. Antik dövrlərdə ancaq yuxarı təbəqələr saçını kəsdirmirdi, hətta təsvir edilmiş tanrılar da uzunsaçlı göstərilmişdir. Bunun əksinə olaraq, ancaq qullar saçlarını kəsdirərdi və buna görə də, qul olmayan azad vətəndaşın öz saçını kəsdirməsi bir eyib hesab olunardı. Əlbəttə ki, qısa saç, yaxud ümumiyyətlə keçəllik ənənəsinə malik, eyni dövrdə mövcud olmuş sivilizasiyalar da olub, məsələn: qədim misir. Qədim misirdə saç murdar və mənfur bir şey hesab olunardı və buna görə də, insanlar saçlarını dibindən kəsdirərdi.
Yaşadığımız dövrə qayıdaq. Saç kəsdirməyin monotonluğa çevrildiyi bir vaxtda uzunsaçın bir sıra üstünlükləri var: pula qənaət; saçınızı kəsdirmədiyiniz üçün pulunuza qənaət etmiş olursunuz. Vaxt; bərbərə getmədiyiniz üçün vaxtınız da özünüzə qalır. Saçın gec yağlanması; - tam əmin deyiləm, bu hər kəsdə belədir ya yox, amma saçımın uzamasından bəri daha yavaş yağlandığını müşahidə etmişəm (p.s. Zavoddan təzə çıxmış maşın kimi yağlı saçlarım olub) - saçınız yavaş yağlandığı üçün çimə və ya ayrıca başınızı yuya bilmədiyiniz vaxtlarda sizi böyük bir yükdən xilas edir.
Saçınızı uzatmaq yaxşıdır, çünki 60 yaşına qədəm qoyduğunuzda keçmişdə, bir vaxtlar uzun saçlarınızın olduğunu xatırlayacaqsınız. Fərqlilik yaxşıdır, uzun saç sizə yaraşmasa belə, ömrünüzdə bir dəfə bu fərqliliyi təcrübədən keçirin. Dayaz insanların nə dediyinə fikir verməyin. Onların saçlarını kəsdirmək haqqı olduğu kimi sizin də saçlarınızı uzatmağa haqqınız var. Yadınızdan çıxarmayın ki, uzun saç hələ keçən əsrin ikinci yarısında da dəb olub. Keçmiş dəblər müntəzəm olaraq yenidən dəb olur, ehtimal yoxdur ki, bir daha dəb olmasın. Uzunsaçın ən əsas xüsusiyyəti isə köhnəlmiş və ancaq ətalətlə ayaqda qalan ənənələrə qarşı bir etiraz, üsyan əlaməti olmasıdır.