42. Yeniyetməlik dövründə insanın özünü kəşf etməsi belə özünün sayəsində baş verir. Ən azından gördüyüm və bildiyim qədərilə valideynlərdən yeniyetmə uşağa dişə dəyər bir məsləhət verilmir. Adətən uşaq dərslərini oxumayanda gələcəkdə peşman olacaqsan deyib, ondan bunu başa düşməsini gözləyirlər lakin uşaq bunu başa düşəcək səviyyədə olmur. Kütlənin mütaliə vərdişi olmadığı üçün uşağına da mütaliə etmək təşviq olunmur, asudə vaxtlarının olmaması səbəbindən hobbilərə sahib olmadıqları üçün uşağına da yeni hobbilər kəşf etmək öyrədilmir. Ali təhsilli sülalədən gəlməyin də burada bir rolu var. Yanılmıramsa Azərbaycanda 5-10 nəsildir təhsilli olan insanlar yoxdur; bəy sülaləsindən gəlmirsə mümkün deyil. Uzaq başı 3-4 nəsil təhsilli gələn bir ailə ola bilər, bu isə azdır.
Bir yeniyetmə üçün ən əlverişli ehtimal mümkün olan ən qısa müddətdə ətrafını və özünü dərk etməsidir. Dərk etdiyi andan zehni müstəqil olacaq. Mütaliə etməyi də özündən öyrənəcək, yeni hobbilər axtarışına düşməyi də. Çünki ətrafdan diqqətəlayiq bir xeyir gəlmir, maddi imkanlardan başqa hər şey yeniyetmənin özündən asılıdır, bircə valideynlərinin maddi dəstəyinə ehtiyacları var.