1. Freud'un gördüyümüz yuxuları izah edən kitabı.
Sigmund Freudun yuxuların şüuraltı istəklərin ifadə olunma tərzi olduğunu kəşf etməsi, şübhəsiz ki, psixologiya elmində inqilabi xarakterə malik oldu. Onun nəzəriyyəsinə əsasən yuxular alt şüurun arzularını aşkara çıxaran vasitədir. Yuxuları başa düşmək insan üçün özünü tanımaq yolunda olduqca əhəmiyyətli vasitə ola bilər. Çünki yuxuda gördüyümüz hər bir xırdalığın, hər bir simvolun öz mənası var və yuxular bizim gələcəklə olan ən əsas əlaqəmizdir. Yuxular yaşadığımız digər ömürlərdir. Həm bizə verilən ismarıc, həm də ayrıca dünyadır.
Freud Aristotelin yuxular haqda olan fəlsəfi fikirlərindən hərəkət edərək, onun mahiyyəti haqda fikirlər irəli sürür. Aristotel yuxuları tamamlanmamış gündəlik işlərlə əlaqələndirir ki, bu da öz növbəsində Freudun nail olunmamış arzular və gizlin istəklərlə əlaqədar öz nəzəriyyəsində toxunduqları ilə üst-üstə düşür. Bundan əlavə biz başa düşürük ki, standart biliklər və yozum yöntəmləri heç vaxt yuxuları başa düşməyə bəs etmir. Eyni element müxtəlif insanlar üçün tamamilə müxtəlif məna kəsb edə bilər. Bunun üçün gərək insan özü onun mənasını axtarıb həqiqətə toxunsun. Hər şey yuxunu görən insanın həyatından, keçmişindən və məsələnin mahiyyətindən asılıdır. Həmin günün təəssüratları və şəxsin uşaqlığı, xatirələri və yaddaşı, yuxuda görülənləri bir gün başqa mənaya, digər bir gün tamam başqa mənaya gətirib çıxara bilər.

Yuxunun işləmə prinsipi olduqca maraqlıdır. Hətta olduqca tanış sistemin iş prinsipini xatırladır. Senzuranın mövcud olduğu və azad sözün olmadığı total cəmiyyətlərdə adətən hər şeyi olduğu kimi deyənlər ya öldürülür, ya da həbs edilir. Buna baxmayaraq obrazların köməkliyi ilə reallığı müəyyən kütləyə çatdırmaq istəyənlər isə şöhrətli yazıçı, rəssam və ya rejissor olurlar. Beynimizdə də senzura vardır. Çünki onun bir tərəfindən istəklər və arzular varsa, digər tərəfindən onları məhdudlaşdıran, onları təhrif edən qüvvə də var. Bu ikisi birləşdikdə yuxular formalaşır.

Edip kompleksi olmadan Freudun hansısa nəzəriyyəsini və təhlilini oxumaq olmaz. "Yuxuların yozumu"nda da Edip kompleksinə də toxunulur.
Kitabın dili qeyri-xətti olsa da, simvolikanı birbaşa və daha xəfif dillə oxucu ilə bölüşür. Freudu Freud edən və 20-ci əsrin ən nüfuzlu insanlarından birisinə çevirən də məhz onun birbaşa üslubu olub.