1. Qədim Misir mifologiyasında eynicinsli münasibət önəmli yer tutur. Bu mövzuda ümumi fikirlər əsasən 3 sahədən qaynaqlanır:
•Horus və Seth tanrıları haqqında bir mif
•Firon Neferkare və onun generalı Sasanet haqqında tarixi bir nağıl
•ilk homoseksual cütlük olduqları iddia edilən Niankhnum və Khnumhotep türbəsi
Bu türbə 1964-cü ildə Misirşünas Əhməd Musa tərəfindən aşkar edilib və həmin gündən şiddətli bir müzakirə mövzusudur. Niankhnum və Khnumhotep zadəgan deyildilər,lakin kral maniküristlərinin nəzarətçiləri olduqları üçün cəmiyyətdə yaxşı yer tutmuşdular. Belə ki, Greg Reeder başda olmaqla bir çox tədqiqatçı onların evli bir cütlük kimi dəfn edildiyi fikrini irəli sürsə də qardaş və ya əkiz olduqlarını düşünənlər də az deyil. Lakin Niankhnum və Khnumhotep adlarının "yaşadılar və öldülər" mənasını verən cümlənin içində bir yerdə keçməsi ikinci ehtimalı zəiflədir. Eyni zamanda, hər ikisinin öz ailəsi olduğu halda birlikdə dəfn olunmaqları onların sadəcə iş yoldaşı olmadıqlarını göstərir. Hansı ki, bu hal qədim Misirdə daha çox evli cütlüklərə aid idi və eyni rütbəli olduqları üçün bir məzarda dəfn edilmək çox nadir rastlanırdı. Türbədəki heroqliflərin və divar rəsmlərinin bir neçəsi də Niankhnum və Khnumhotep'in qucaqlaşdığını və burun-buruna bir-birinə baxdıqlarını göstərir. Qeyd edək ki, bu Misir mədəniyyətində evli cütlüklərə aid olub, öpüşmək mənası ilə eynidir. Bütün bunlar onların tarixdəki ilk homoseksual cütlük olduqları fikrini daha da dəstəkləyir .