55. Sosial dövlətdə yaşamadığımızdan çox vətəndaş virusa yoluxmaq ehtimalına elə də əhəmiyyət vermir, əsas dərdi işini itirməməkdir, gəlir yerini itirməməkdir.

190 manat kimi verdikləri ödənişin təyinetmə yolunu neçə dəfə tənqid etmişəm, gözümün qabağında evi, maşını, virusdan asılı olmayan işə sahib şəxslərə ödənişlər edildi, həm də hər qapanmada. Amma əsl ehtiyacı olanlar kənarda qaldı, ağır olan həyat şəraitində bir də işsizlik, pulsuzluq, pandemiya dərdi çəkdilər. Normal qidalanma olmadı, istirahət olmadı, demək olar ki, 2020-ni çox bərbad vəziyyətdə keçirdik. Bunların əks-təsiri də meydana gəldi, cansıxıcı səviyyədə sakit təbiətli olan mən artıq özümü hər yerdə, hər zaman bağırmağa, daima səsimin tonunu qaldırmağa məcbur hiss edirəm. Psixoloji olaraq bir məlumatım yoxdur, lakin inanıram ki, çox insan mənim kimi bir narahatlığın, bir səksəkənin içərisindədir.

Tək ümidim 2021 idi, qapanmalardan, üst-üstə gələn qıcıqverici hadisələrdən dolayı səviyyəni ən alta çəkdim. Heç nə gözləmirəm, nəyəsə ümid edib peşman olmaq qədər sancılı hiss yoxdur.