23. Bu aralar gündəmdə olan mövzudur. Səbəb isə həm feministlərin kiçik və təqdir etdiyim fəaliyyətləri, həm də son zamanlar daha çox eşitdiyimiz qadın cinayətləridir. insanların bir hissəsi elə reaksiya verir ki, nolub 2021-də çox qətl olur? Xeyr, həmişə belə idi, sadəcə indi eşidirsiz. Niyə qadın cinayətləri belə çox baş verir?
Çünki bizdən əvvəlki nəslin kişi anlayışı tamam fərqlidir. Bu fərq etmir, şəxs təhsillidir, ya təhsilsiz. "Kişi qadını döyər də, söyər də, hər şeydən ötrü dədə evi" zir-zibilindən, "indi atanın haqqı yoxdu, çağırıb qızına bir şillə vursun,xeyrola əzizləyəndə oluuur" cəfəngiyyatına çoxu dilə gətirməsə də belə düşünür. Hamını dəyişə bilmərik, amma heç olmaya cəmiyyətin öyrədənləri belə olmayaydı. Bu barədə heç vaxt unutmayacağım xatirəm mənə elə pis təsir edib ki...
Bir dekan universitetin ilk günü iclasda tələbə və valideynlərə dedi ki, baxın, saat 6-dan sonra tutorları narahat etməyin. Bəlkə (gülə-gülə) birini əri döyür, desin ki ay ər, gözlə cavab verim sonra döyərsən? Zalda bir mən şok oldum. Hamı gülümsədi, gənc tutorlar utandı.
Bu birinci səbəb. Şiddət aşılanır.
ikinci isə erkən və "dədəmverdi" evlilikləridir. Bunun bir nömrəli səbəbkarı dövlətdir. Sən 16 yaşlı qıza niyə nigah icazəsi verirsən? Niyə o uşaq xəstəxanaya doğmağa gələndə baxım-görümlə yaşı çox yazılır, amma təcavüzkar kef edir? (qanuna görə qız hətta o yaşda öz iradəsi ilə evlənmiş olsa belə ər və atalar cinayət məsuliyyəti daşıyır)
Bəzi şeylərə elə biz özümüz də göz yumuruq. Kim indiyə qədər ona uşaq evliliyi üçün dəvətnamə gələndə salona yox, polisə gedib? içi mən qarışıq heç kim.