1122. Artıq özünə bir missiya yükləməli olan, bu qaranlıq cəmiyyətə işıq tutması gərəkən platform. adsız dəyirmandakı xoruz adlı yazarın başlığında intiharla bağlı ilk entryləri gördükdən sonra istədim mən də bir şeylər yazım amma nə yazacağımı bilmədim. Tanımırdım onu, 1-2 entrysini oxumuş olaram ya yox, sadəcə nikini görəndə "cool niki var" deyə düşündüyüm yadımdadı. Cənnət adlı bir yer varsa, orda hüzur tapmasını diləməkdən başqa bir şey gəlmir əlimdən təəssüf. Bu dövran belə davam etməz, bir şeylər dəyişməlidir. Hardasa 10 ildir ki, bu sözlük var, 7 il öncə universitet həyatımın ilk illərində kəşf etmişdim mən. Facebookda insanların süniliyindən qaçıb bura sığınmışdım. Özümə məxsus bir qala idi sanki, heç kimə demirdim. Bir çox digər yazarlar da bu düşüncədədir o vaxtdan gördüyüm qədərilə. 10-15 nəfər stereotiplərdən sıyrılmış gənc yığışmışıq bura, hər gün birimiz cəmiyyəti , mentaliteti tənqid edən entrylər yazırıq, digərlərimiz də əjdahalayırıq amma nə dəyişir? Dəyişməsi üçün nə etdik bu qədər vaxt boyunca?... Bayaq postlar bölməsində bir yazar intiharla bağlı facebookdakı xəbər postlarındakı şərhlərə baxa bilmədiyini yazmışdı. Tamamilə anlayıram onu. Amma belə bir məqam da var ki, o sözdə əxlaq keşikçilərinin şərhlərini hələ formalaşmamış gənc beyinlər də oxuyacaq, doğrunu və yanlışı ayırd etmək istəyəcək amma tək o tipdə şərhləri görsə, bəlkə də, bizlərin doğrusu onun yanlışı olacaq və bunda bizim səssiz qalmağımızın da rolu olacaq. Əminəm ki, o yazar bir neçə yerdə öz fikirlərini yazıb amma yetmir dostlar, təəssüf ki, yetmir. Bu cahillərin, girdirmə əxlaq keşikçilərinin, qatı radikal dindarların azalaraq bitməsini gözləməklə olmayacaq. Biz sayca artmalıyıq. Buradakı fikirlər daha çox insana çatmalıdır. Onlar həmişə olacaq ancaq bizim sayımız artsa, onlar belə rahat, düşüncəsizcə hər istədiklərini deyə bilməyəcəklər. Ona görə sizə səslənirəm dostlar, sizə səslənirəm çünki, mən hər zaman təbiətim gərəyi ətrafımda olan hər şeyə laqeyd, vecsiz olmuşam. Təbiətimi qısa müddətlik olsa da dəyişərək bu entryni yazacaq gücü özümdə tapdım, amma əsl dəyişikliyi reallaşdıra biləcək gücə siz sahibsiniz. Sizə güvənirəm.