16. Hər insana həyatı boyu həqiqi müəllimlə tanış olmaq nəsib olmur. Amma məncə mən xoşbəxt insanlardanam ki, əsl müəllimə rast gəlmişəm. Onun sayəsində müəllim olan birinin əslində necə olduğunu, hansı keyfiyyətlərə sahib olduğunu öyrənmişəm. Onun sayəsində müəllimlərin necə müqəddəs kimsələr olduqlarını dərk etmişəm. Hərçənd ölkəmizdə təəssüf ki, çox sayda müxtəlif səbəblərdən dolayı müəllimlik adına ləkə gətirənlər var və bu, gələcək nəsillər üçün də birbaşa təhlükədir. Amma həmişə problemlərin həll olacağına dair ümidli olmaq lazımdır. Mən öz müəllimim haqqında musiqinin və piano ifaçılığının sirlərini öyrədən o möhtəşəm insan haqqında danışım. O, hər şeydən əvvəl məni çox çox yaxşı tanıyırdı. Məncə bu çox önəmlidir. Biz müəllimimlə müəllim-şagird münasibətindən daha çox dost kimi idik. Məni məndən də yaxşı tanıyırdı. Yadımda bir dəfə istəmədən də olsa xətrinə dəymişdim. Belə olan vaxtlarda dostların biri birilərindən olan gözləntilərinə görə inciklikləri olur. Müəllimim də məndən incimişdi. Amma bir gündən artıq çəkmədi ). Demək istədiyim aramızda həqiqi dost münasibətini yarada bilmişdik. Onun bir işin müvəffəqiyyətlə nəticələnməsi üçün həmişə dediyi bir şey vardı. Şagird, müəllim və valideyn üçlüsü. Və mən bunun əyani şahidi olmuşam. Bu üçlünün hər biri öz işini düzgün şəkildə həyata keçirdikdə nəticəsini verməməsi imkansız idi. Qazandığım nailiyyətləri buna borcluyam. Yenə demək istəyirəm ki, nə xoşbəxt insanam ki, əsl müəllimim olub, onu tanımışam, ondan öyrənmişəm və öyrənməyə də davam edirəm.