Olaydımı, olmayaydımı? Kaş olmayaydı.
Heydər Əliyev Azərbaycan cəmiyyətində və siyasi çevrələrdə klanlaşmanı və ibtidai icmalara xas tayfabazlığı möhkəmləndirmiş fiqurdur. Məhz onun sayəsində Azərbaycanda idarəçiliyin irili-xırdalı bir çox postları layiqliyə (meritokratiyaya) əsaslanmadan sadəcə qərbi azərbaycanlı və ya naxçıvanlı olduğuna görə bir qrup yaramazın tabeliyinə keçmişdir. Heydər Əliyevin traybalizminin (tayfabazlığının) fəsadları öz əsasını hələ sovet dönəmindəki idarəçiliyinin ilk illərindən götürür. Dövlət idarəçiliyindən azca da olsa başı çıxan hər kəs bilir ki, bir xalqa ediləcək, bəlkə də, ən böyük pislik həlledici postlara ləyaqətsiz adamların yerləşdirilməsidir. Beləcə, ayaqları baş, başları ayaq edən Heydər Əliyev Azərbaycan xalqına Murtuz Ələsgərov, Ramiz Meydiyev, Əli Həsənov, Hacıbala Abutalıbov kimi ləyaqətdən və layiqlikdən kasad fərdləri rəva bildi.
O, bununla yetinmədi. Müəyyən bir müddət məcbur qalıb fikir plüralizmin ölkədə közərməsinə göz yumsa da, əli bir az güclənən ki, xalqın səsini boğdu. XXI əsrdə müasir Avropanın qulağının dibində yaşayan bir cəmiyyətdə ifadə azadlığı yerlə bir oldu.
Bunlar azmış kimi anti-konsitusyon yolla hakimiyyəti öz vəfatından qabaq oğluna təhvil verib Azərbaycanın ailə monarxiyasına çevrilməsində əsas addım atdı. Onun tutduğu siyasi xətti layiqincə davam etdirən oğlu isə daha sonra öz həyat yoldaşı Mehriban xanımı ölkənin özündən sonra ikinci şəxsi, Azərbaycan Respublikasının Birinci vitse-prezidenti, təyin edəcəkdi. Üstəlik, bunlar yetməzmiş kimi ölkənin turistik potensialını göstərən videoçarxlardan tutmuş ən gəlirli biznes sahələrinin monopoliyasına kimi bütün işlərə öz ailəsini daxil edəcəkdi. Bu gün Azərbaycanın elə bir kəndi yoxdur ki, orada insanlar torpağın, suyun, məhsulun heç neçə qiymətə əllərindən zorən alınması üzünən Paşa Holdinq başda olmaqda prezident ailəsi şirkətlərindən bezar olmasınlar.
Heydər Əliyev Azərbaycanın belini elə qırdı ki, onun qurduğu başında dövlət başçısının oturduğu rüşvət piramidası sisteminin üzündən Azərbaycan xalqı milyardlarda neft gəlirindən heç bir dad almadı, ölkənin səhiyyəsi və təhsili batdığı bataqlıqda qaldı, millətimizin ən parlaq gəncləri və ziyalıları ölkədən ya qaçmalı, ya da çətin şəraitdə yaşamalı oldu. Bu sistem bizi elə zəlil günə saldı ki, günü bu gün Azərbaycan cəmiyyəti Avropanın ictimai təfəkkür baxımından ən geridəqalmış cəmiyyətidir (Türkiyədən də, Ermənistandan da, Rusiyadan da, Belarusdan da!). Məhz Heydər Əliyevin siyasi kursunun nəticəsində ölkəmiz Rusiyanın regional maraqlarını təmin etmək üçün şəhid verən məmləkətə çevrilib. Onun fəaliyyətinin əməli nəticəsidir ki, Azərbaycan Respublikasının Konstitusiyasında tövsif olunan prinsip və dəyərlərin keşiyində durmaqla hökmlü Azərbaycan Respublikasının Prezidenti bu gün konstitusiyanın və konstitusyon quruluşun qəniminə çevrilib, ölkədə ən ədalətsiz qərarlar ədaləti bərqərar etməli olan məhkəmələrdə verilir, uşaqların və gənclərin ictimai tərbiyəsi təhsil və təlimi təşkil etməli olan orta və ali məktəblərdə pozulur, qanun keşikçisi olan hüquq-mühafizə orqanlarının özü mütəşəkkil cinayətkarlıqla məşğul olur.
Budur YAP və onun banisi Heydər Əliyevin idarəçilik sistemi - cəmiyyəti şikəst qoy və hökm sürərək tala.
Storisinə Heydər Əliyev rəsmi qoyanlar isə birmənalı olaraq ya dünyagörüşsüz avam kütlə, ya da bir tikə çörəyə görə hər yola əl atan cılızlardır, başqa heç nə."
hasan isgandar
