282. Bir rəngi yox, göylərin min rəngini sevirəm
Bir gülü yox, güllərin çələngini sevirəm.
Mən çıxmağa təpə yox, uca dağ istəyirəm,
Həyatı həyat kimi yaşamaq istəyirəm.

Göydə qürub çağı da, dan yeri də gözəldir
Həyatın sevinci də, kədəri də gözəldir
Həyat bir cıdır düzü, bir döyüş meydanıdir
Hər kəsi öz qüdrəti, öz cürəti tanıdır
Bu meydanda heyif ki, daim eniş axtaran
"Azca aşim, ağrımaz başım" deyənlər də var.
Kədərdəki nəşəni, zövqü anlamayanlar
Həyatın nəşəsindən, fərəhindən nə anlar?
Hər kədəri səadət, hər sevinci qəm izlər
Əsil könül həm qəmi, həm sevinci əzizlər.
Təlatümsüz ürəklər qovuq kimi boş olur
Daim sevinc axtaran, daim qəmə tuş olur.
***
Qardaş , min duyğu ötsün ürəyindən bir anda
Sən qımışma güləndə, inləmə ağlayanda
Ağlasan hönkür ağla, gülsən qəhqəhə çək gül!
Gülsən də, ağlasan da tamam doysun qoy könül.

-bəxtiyar vahabzadə