2. Universiteti bitirdikdən sonra çoxları həyatının sonrakı mərhələsinə addım atır. Bəziləri magistraturaya hazırlaşıb iki il də elə oxuyur, sonra iş həyatına başlayır və ya akademik karyerasını davam etdirir. Təhsilli olmaları aldıqları az maaşa və çəkdikləri əziyyətə dəyməməsinə baxmayaraq, ən azından əli ayağı təmiz hambal olmalarına kömək edir. Bəziləri day-day vasitəsilə bir işə düzəlib, həyatına o cür davam edir. Standart həyat... Bəziləri elə tələbəlik dövründən qara qula çevrilmiş olur, part time işlərdə işləyib, sonra da tam rejimdə, daha yüksək pozisiyada həmin iş yerində çalışır. Yerdə qalanlar isə işsiz, gücsüz, nə vaxtsa taleyin üzlərinə gülüb, ixtisaslarına uyğun iş tapa biləcəkləri vaxtı gözləyirlər. Həmin vaxt ərzində bol kitab oxumalarını, bacardıqları qədər xarici dil öyrənmələrini və tələbəlik illərində hamının məsləhət gördüyü "özünü inkişaf etdir"mə mərhələsindən keçmələrini məsləhət görürəm. Öyrəndiyi biliyin insanı nə vaxt irəli atacağı bəlli olmaz. Bəlkə bir gün lazım olar deyə nə gəldi öyrənin, hər şey haqqında məlumatınız olsun.