78. Mənə elə gəlir ki, indiki münasibətlərin tez bitməsinin ən böyük səbəbi tərəflərin güzəştə gedə bilməməsidir. Özümün də daxil olduğu münasibətlər üçün onu deyə bilərəm ki, insanların beynində belə bir fikir formalaşıb; "məni olduğum kimi qəbul etsinlər.." niyə axı?! Niyə sənin hər şeyini olduğu kimi qəbul etməlidirlər. Bəs sevgi güzəştə getmək, onun sevmədiyi şeyləri etməməyə çalışmaq, onun üzü gülsün deyə özündən pay vermək deyil? Mən demirəm ki, hər şeyi qarşı tərəfin ürəyincə edin, amma elə şeylər var ki, onlarda düşüncəli olmaq lazımdır. Tərəflər tərəzinin gözünə eyni dərəcədə sevgi, hörmət və anlayış qoymalıdır. Biri digərindən artıq olanda tarazlıq pozulacaq. Onsuz da bərbad olan bu həyatın içində bir-birinizə güzəştlər etməyi bacarın. Səhvlərinizdən dərs çıxarın. Üzr istəyin. Qollarına qaçın. Qucaqlayın. Öpün və bağrınıza basın. Bağışlamağı bacarın. Bu qədər problemin içində üzünüzü güldürən bir-iki şey var, onları da eqonuza, cəmiyyətin beyinlərə zorla yeritdiyi narsist düşüncələrə qurban verməyin.
Hər şeyə rəğmən bir gerçək var ki, bəzi insanlar sizin dəyərinizi heç zaman anlamayacaq. Siz onlar üçün özünüzü fəda etsəniz belə. Çətin olsa da, bəzən bunu qəbul edib irəliyə baxmaq lazımdır. Bəzən biz doğru insanlara gecikirik və ya bəzən yanlış insanlara tələsirik. Həyat irəlisi bilinməyən mücərrədlikdir. Xoşbəxt olduğumuz anları doya-doya yaşayaq, onsuz müəyyən zaman sonra pis olmağa xeyli vaxtımız olacaq.