144. (baxma: böyük qırmızı işıq)

bu gün işdən bir az gec çıxdım. Yorğun idim. ikinci həftədir ki, altı-bazar demədən işləyirəm. Düzü, hansısa faydasın görmürəm. Bəlkə də, var. bilmirəm. işdən çıxanda tək fikirləşdiyim evə gedib tez yatmaq idi. bir aydan çoxdur, eynəyim itib. Eynəksiz işləmək daha çətin olur. Gedib nə qədər yatsan da, səhər ölü kimi oyanmaq qaçılmazdır. işdən gec çıxmağın yaxşı yanlarından biri evə nisbətən axan tıxacla çatmaqdır, deyəsən. Metro nisbətən basabas olsa da, minmək olurdu. Düşəcəyim stansiyaya çatmışdım. Etməli olduğum tək şey var idi: manatlıq taksi tapıb evə getmək. Yadımdan çıxmışdı axı: yağış yağanda manatlıq tapmaq itin zülümü olur. yəqin ki, ən yaxşı ehtimalla yenə bir manat 50 qəpiyə gedir hamısı. Yuxusuzluqdan və gözümün ağrısından ölürdüm. 50 qəpik üçün yağışda qalmaq məntiqsiz gəlirdi. manat yarımlıq taksi tapıb arxada oturdum. yorğunluqdan yolun çox hissəsində mürgülədim. işdən gec çıxsam da, tıxac hələ də var idi. axan idi, amma var idi. bilmirəm, sizdə də belədir, ya yox. Maşında bir az yatan kimi ürəyim bulanmağa başlayır. içkidə də belədir. Gərək içdimsə, başımı qoymayım yerə. Ürəyim bulanır birbaşa. oyananda telefonumun bataryası bitmişdi artıq. işə gedəndə adapteri götürmək yadımdan çıxmışdı. məcbur, Musiqisiz dümdüz yola baxa-baxa getməli idim...

yarıyuxulu olmağın təsiri ilə yola baxanda hər yeri qırmızı görürdüm. bir-birinin ardınca gedən maşınların arxa stop işığı hər tərəfi qırmızıya bürümüşdü. ağ və tünd-boz maşınların üstündə yağışa görə daha da bəlli olurdu. qırmızı rəngi yansıdırdı. başımı yoldan çəksəm də, qırmızı rəngin hələ də fərqli şeylər üstündə görürdüm. yanacaqdoldurma məntəqəsindəki benzin qiymətləri qırmızı rəng idi. bəlkə də 100 dəfə yanından keçdiyim ancaq fikir vermədiyim "rahat marketin" "rahat" sözü qırmızı idi. Qırmızı rəngli neon işıqlar. başımı qaldırıb yuxarı qaldıranda irəlidə buludun qırmızılığını da sezmək olurdu. Ətrafımda tək gördüyüm şey qırmızı rəng idi. maşınlar, marketlər, paketlər, qapıların üstündəki "open" yazısı, "stop" işarəsi, sürət limitinin işarəsi... Gözümü yumdum. Evə kimi hələ var idi. evə gedib onsuz da yata bilməyəcəkdim. 12-dən tez yata bilmirəm. yuxudan əlavə aclıqdan da ölürdüm. gözümə mavi, qırmızı işıq düşürdü. maşının içi iki rəngə büründü bir müddət. təcili tibbi yardım idi. "bir sənin qırmızın çatmırdı", - deyib başımı atdım. 5-10 dəqiqə sonra maşının yavaşlamasına və içindəki adamların "vay-vay" deməklərinə oyandım. bayaqkı təcili tibbi yardım maşınının hara getdiyi məlum oldu: avtoqəza baş vermişdi. qırmızı işarələrə diqqət etmədiyinə görə idi. Böyük qırmızı işığa...