1209. sizə sonuncu dəfə məyus olduğum bir şeyi danışacam: mənim çabalarıma rəğmən qavraya bilmədiyim bir fəndə yoldaşlarımın çabalamadan yüksək nəticə əldə etməsi məni çox məyus edir. bu paxıllıq deyil, onların paxıllığını çəkmirəm. sadəcə vəziyyət belədir ki, magistraturaya qəbul imtahanına hazırlaşdığım yoldaşlarımla mənim aramdakı fərq bundan ibarət idi ki, mənim yuxuma zəhər qataraq öyrənməyə çalışdığım məntiq fənninin metodlarını, yoldaşlarım çaba sərf etmədən asanlıqla həll edirdilər. bu, təbii ki, bütün tapşırıqlara aid deyil amma, di gəl ki, evə verilən 50 sualdan 20 sualı gəlib yenidən soruşurdum. hər dəfə sualı verdikcə yoldaşlarımın, "bunu nə var eləməyə?", "ay daa, yaza bilmədin bunu?" sualları ilə qarşı-qarşıya qalırdım. sırf bu sualları eşitməmək üçün yaza bilmədiyim sualların hamısını demədiyim olmuşdur. imtahana yaxın bir şeyi dərk etdim ki, məsələ çox çalışmaq, çox düşünmək deyilmiş, əsas məsələ qarşındakı məsələyə sənin tutumunun olub-olmaması imiş. belə ki, misal üçün sən humanitar fənləri qavraya bilmirsənsə, o tarixi, o qrammatikanı 100 dəfə oxu, yenə də yadında qalmayacaq. yox əgər sən humanitar fənləri qavraya bilirsənsə, 1 dəfə oxumağın kifayətdir. bax elə bayaqdan izah etməyə çalışdığım da budur. yalan + lovğalıq olmasın, sırf ev tapşırıqlarını sonuna qədər tamamlamaq üçün gecə saat 2-yə, 3-ə qədər işləyib yatırdım. bəzən 4-də yatırdım. səhər tezdən 8-də durub qaldığım yerdən davam edirdim. sonra 12-də çıxıb gedirdim ki, vaxtında dərsə çata bilim. bacardığım qədər də yolda yazırdım. bunun qabağında bütün gecəni istirahət edib, ev tapşırığını sadəcə səhər tezdən oyanaraq edib gələnlər də olurdu. məni yandıran bu idi. məni onlardan üstün qılan şey tarix, qrammatika, biraz da fəlsəfə bilməyim idi. amma ki, nə çarə? imtahana bunlar düşmür axı. nəticədə mən 50 sualdan 29 düz yazanda onlar, 35/40 düz yazdılar. və onlar mənim qədər əzab-əziyyətə qatlanmadılar. entry-min əvvəlində dediyim kimi bu paxıllıq deyil, sadəcə onların az əziyyət çəkərək məndən yüksək nəticə göstərmələri özümə olan motivasiyamı azaltdı. belə baxanda onlardan heç nəyim əskik deyil, çoxlarından da bir çox mövzuda savadlıyam. di gəl ki, riyaziyyat və onun törəməsi olan fənlərdən çox zəifəm. və bu zəifliyi mən seçmədim, yaradıldığım gündən belə yaradılmışam. riyaziyyatdan zəifəm amma tarixdən, qrammatikadan daha yaxşıyam. mənim motivasiyam budur. amma ixtisas fənnimin tarixlə yox, riyaziyyatla əlaqəli olduğunu xatırladıqda artıq başqa seçimimin olmayacağını, ixtisasım üzrə davam etməyə məcbur olduğumu anlayıram.