1. Flarmoniya bağındayam, həmişəki kimi yalnız. Düsünürəm, həmisəki kimi dərindən. Nə baş verir, necə baş verir, niyə baş verir - son 1 həftənin proqnozunu verməyə çalışıram. Bu son 1 həftədə gör neçə yerdə oldum axı mən. Ən maraqlı yer haraydı görən? Düsünürəm, üzümü yoracağımı və gecə bir qədəh şəraba möhtac olacağımı bilə-bilə. Nolub mənə, mən ki olduğum yerləri analiz edərdim. Vay səni Alik, lap qocalmısan ki. Bu dünyada o qədər vaxt keçirmisən ki, neyləmək istədiyini belə bilmirsən. Çox yaşa Erich Fromm, çox yaşa Milan Kundera, çox yaşayın filozoflar. Siz olmasaydınız bu zavallı Alik cibinden tapdıgı 5 manata sevinə bilərdimi. Fəvvarəyə baxıram, ancaq gözüm görmür. Ətrafıma qarşı lal, kar, koram. Güya çox önəmliymiş kimi arada özümü xəyal dünyasından çıxardır, ətrafıma nəzər salıram. Amma içiboş olduğunu güman etdiyim başları üzərində gəzdirən gözəl geyimli və fiqurlu bədənlərə baxarkən Mövlananın sözlərini bir daha xatırlayıram. Hayıf səndən Alik. Bundan 5 il əvvəl sənin dərdlərin belə deyil idi. indi ağzındakı son dişini tökməyi gözləyən qoca qurda bənzəyirsən. Eybiyox, gəl mən ən yaxşısı bacardığım ən gözəl şeyi, düşünməyi icra edim. Görən ölmək üçün ən uyğun yaş hansıdır. Əgər 25-sə, mən artıq gecikmişəm, yox əgər 35-sə, hələ önümdə çox yol var. ilahi, bu ne oyundur məni salmısan. Həyatdan ümidli, şən, sevgi dolu Alik gedib, yerinə "inspektor" Alik gəlib. Görən bu qədər sual verməyi haradan öyrənmişəm. Birdən dururam, qarşımdakı mərmərdən məhəccərə bir quş qonur. Qonsunda, neynəmək olar. Görən o hansısa paralel kainatların birində hələ də havada uçurmu. Bəlkə də, o yalnızca mənim olduğum kainatda canlıdır. Əgər elədirsə, onun sağ olduğu kainatlar artacaq, hər etdiyi hərəkət həmçinin edilməmə ehtimalıyla başqa bir alternativ kainat yaradacaq, və bu beləcə, mənim yaşadığım kainat dağılana qədər davam edəcək. Bəs sonra? Sonra mənim olduğum kaninatın hələ də dağılmadığı alternativ kainatdan bir kainat yaranma silsiləsi yenidən doğacaq, necə ki möhtərəm xalqımın içindəki başıboşlar çoxaldı. Vay-vay, səs çıxarma Alik, ayıbdır.
Park bu gün səssizdir. Normaldır, hansı bekar səhər saat 7-də buraya gələr ki. Ancaq mənim kimi Aliklər. Yazın son aylarına doğru buralar daha da qalabalıqlaşır. Şəkil çəkdirməyə gələn 11-ci siniflər parkın hər tərəfini ələ keçirir. inana bilmirəm, bundan 10 il əvvəl mən də onlardan biri idim. Tanrı, o vaxt dünya necə də sakit, necə də gözəl idi. Yoxsa mən elə idim. Aha, yeni mövzumuz açıldı, əziz oxucular. Vaxt fəlsəfə vaxtıdır, məkan isə düşünə biləcəyimiz istənilən yer. Məncə, insanlar hər zaman eyni növ problemləri olan illərdə yaşayırlar. Tək fərq onların artmağa davam edən yaşı, və dəyişən dünya baxışıdır. Alik, lap dəli olmusan, bu nə danışıqdı. Heç müsəlmana yaraşırmı belə sözlər, belə düşünmək. Eh Alik, deyəsən ateist olduğun vaxtları yaman tez unutmusan. Nə olsun, Alik, məgər atesitlə müsəlman moral prinsip olaraq eyni şey deyilmi. Aralarındakı tək fərq dindarın atesitden 1 vahid az Allahdan imtina etməsidir. Məgər, Allah imtina ediləsi bir şey idi ki? Bəli. Deməli, belə çıxır ki, Allah var, amma bəziləri ondan imtina edir. Yox. izah et, Alik, qoyma nəsə qaranlıq qalsın. Mənim xalqım qaranlıqdan qorxur axı. Cəld ol, işıqları yandır. Allahın varlığı bilinmir, onun ideyası isə əqil qazanan insanlar arasında həmişə olub. Paho, sənə dedik qaranlıq qoyma, lap başqa sual yaratdın ki. Eybiyox, Alik, qoy biraz düşünsünlər. Ey mənim möhtərəm xalqım, necə oldu ki sahib olduğun ateist kütlə də, əslində, dindar kütlən kimi inadkarlığa başladı. Axı, onlar sorğulayan tərəf olmalı deyildimi. Yox, bizim xalqımız ancaq aldığı az maaşı, ödədiyi vergiyi, kommunalı, bahalaşan qiymətləri sorğulayır. Ancaq heç biri zamanında buraxdığı səhvləri, həyatını sonsuza qədər təsirləndirəcək olan qərarları sorğulamır. Bəlkə hökumət düzdür, biz səhvik. Bəlkə də hansısa paralel kainatda vəziyyət tam olaraq belədir. Bəlkə, o paralel kainat elə bu kainatdır. Nəysə, Alik, nəysə. işə getmək vaxtıdır, şərəfli peşəni yerinə yetirməyə davam etməlisən. Pulu qonşu kainatdakı Alik qazanar, ürəyini sərin tut.