2. Ras al Ghul DC Comics kainatının ən məşhur canilərindən biridir. Adı ərəb dilindən “Şeytanın başı” mənasını verir. ilk dəfə 1971-ci ildə Batman komikslərində peyda olub və qısa zamanda Batman-ın ən təhlükəli düşmənlərindən birinə çevrilib.

Ras al Ghul əsrlər boyu yaşamışdır. Onun uzunömürlülüyünün sirri Lazarus quyularıdır. Bu sehrli mənbələr sayəsində o, ölümdən sonra belə dirilə bilir və daim gənc qalır. O, özünü dünyanın xilaskarı hesab edir və inanır ki, Yer kürəsini xilas etməyin yeganə yolu bəşəriyyətin böyük hissəsini məhv etməkdir. (eynilə Tanos kimi)

Batmanla münasibəti xüsusi xarakter daşıyır. Ras al Ghul, Batmanı yalnız rəqib yox, həm də özünə layiq varis kimi görür. Onun qızı Talia al Ghul ilə Batmanın münasibətindən isə Damian Wayne doğulmuşdur ki, o da sonradan Robin olmuşdur. Buna baxmayaraq, Batman heç vaxt Ras al Ghulun qəddar metodlarını qəbul etməmişdir.

Ras al Ghul komikslərlə yanaşı animasiyalarda, video oyunlarda və filmlərdə də təsvir olunub. Ən məşhur canlandırması isə Christopher Nolan-ın The Dark Knight Trilogy filmlərində Liam Neeson tərəfindən olmuşdur. Burada o, “League of Shadows” adlı gizli təşkilatın lideridir və Gotham şəhərini korrupsiyadan təmizləmək üçün məhv etməyə çalışır.

Ras al Ghul sadəcə bir cani deyil, həm də özünü ideologiyası ilə əsaslandıran, “xilaskar” obrazı yaradan mürəkkəb bir fiqurdur.