10. Bir oğlanı heç bir şəkildə xarizmatik göstərmədiyinə inandığım fəaliyyətdir. Müasir dövrdə istər oğlan, istər qız olsun - bir fərdin sosial məsuliyyət hiss etməsi onu şəxsən mənim gözümdə daha xarizmatik edir. irəlidə, maşın sürmək və sosial məsuliyyəti əlaqələndirməyə çalışacağam. Ancaq, əvvəlcə, gəlin qəbul edək ki, maşın sürməyi uşaqlıqdan bir çoxumuz qazan qapağı ilə, hətta kiçik bir taxta parçası ilə də olsa icra etməyimiz millət olaraq bu fəaliyyətə böyük rəğbətimizin olduğunu göstərir; bu fəaliyyət bizə özümüzü tam hiss etdirir - sükan bizdədir, dolayısı ilə kontrol bizdədir.

Bu sevgi təkcə bizə aid deyil - başqa millətlərdə də yüksək avtomobil sevgisi müşahidə etmək olar. inkişafla, geridəqalmışlıqla əlaqəsi yoxdur. Amerikalılarda, türklərdə və bizdə bunu daha çox müşahidə etmişəm. Bir şey maraqlıdır, bu sevgi bizi hansı təkamül səviyyəsinə çatdırır, bizi tam olaraq hara aparır?! Çox vaxt lağlağı edib üzərindən keçirik, lakin, ölkəmizdə insanların avtomobilə çox bağlı olması, artan avtomobil idxalı, buna bağlı olaraq artan tıxaclar, sürücülük vəsiqəsinin asan əldə olunması və bütün bu problemlərin aradan qaldırılması ilə bağlı aktiv maarifləndirmə tədbirlərinin görülməməsi ölkəmizin təmiz, insan yönümlü şəhərlərin formalaşdırılması istiqamətində irəliləmədiyinin və ətraf mühitin təmizliyi, yol təhlükəsizliyi baxımından heç də yaxşı yerə getmədiyinin göstəricisidir.

Bəlkə, maşın getdikcə ucuzlaşar, almağa heç vaxt imkanı olmayanlar da alar. Amma, düşünürəm ki, mütləq, sükan arxasına oturan kimi, maşının böyüklüyünə və yolda tutduğu sahəyə görə özünün dünyadakı əhəmiyyətini təyin edən, ayağını maşından çölə atan kimi özünü lüt görən, özünə hörməti itən, yolda piyada keçidindən keçməyi özünə sığışdırmayan insancıqları bu fəaliyyətdən məhrum etmək lazımdır.