1. Ginga Eiyuu Densetsu və ya digər adıyla Legend of the Galactic Heroes, yapon yazar Yoşiki Tanaka tərəfindən yazılmış elmi-fantastika janrında roman seriyasıdır. Roman ümumilikdə 10 hissədən ibarətdir. On hissəli romandan əlavə olaraq eyni kainatda keçən kiçik hekayələri də mövcuddur. Əsər Yaponiyada 1988-ci ildə "ilin ən yaxşı romanı" kateqoriyasında Seiun mükafatına layiq görülmüşdür. Seiun mükafatı Yaponiyada hər il əvvəlki təqvim ilində ən yaxşı elmi-fantastika əsərlərinə verilən spekulyativ fantastika mükafatıdır. Onu da qeyd edim ki, yazarın Arslan Senki və Sohryuden: Legend of the Dragon Kings adlı digər məşhur romanları da mövcuddur.
Romanın ilk manqa adaptasiyasının müəllifi Katsumi Michihara olub və manqa orijinal romanın ilk iki cildini əhatə edib. Manqa 1986-cı ildən 2000-ci ilə qədər çap edildi və on bir cilddə toplandı. Manqanın dörd cildlik davamı olan Legend of the Galactic Heroes: Portrait of Heroes isə 2006-12-ci illərdə çap üzü gördü. Manqanın bu hissəsi orijinal əsərə daha sadiqdir hətta animeyə nəzərən daha sadiqdir. Lakin bəzi gözə çarpan dəyişikliklər də mövcuddur. Bunlara bəzi personajların cinslərini misal göstərmək olar. Akira Kasahara manqada mexanika hissələrinin çizimlərində Michihara ilə birlikdə çalışmışdır. Michihara həmçinin qısa yan hekayə olan Golden Wings`ı 1986-cı ilin avqustunda one-shot manqa olaraq çap etmişdir.

ikinci dəfə manqa adaptasiyası Ryu Fujisaki tərəfindən 8 Oktyabr 2015-ci ildə Shueisha's Weekly Young Jump jurnalında işıq üzü görmüşdür. Manqa daha sonra 19 Fevral 2020-ci ildə Ultra Jump jurnalına transfer olmuşdur. Shueisha, manqanın bölümlərini ayrıca tək tankobon cildlərə toplamağa qərar verdi və ilk cild 19 Fevral 2016-cı ildə yayımlandı. 19 Avqust 2022-ci ilə qədər olan məlumata əsasən ümumilikdə 24 cild yayımlanmışdır.
Anime adaptasiyası özünü çox gözlətmədi. Əsərin uğurundan sonra eyni adı daşıyan anime adaptasiyası çəkilmişdir. ilk başda giriş hekayə kimi Legend of the Galactic Heroes: My Conquest is the Sea of Stars anime filmi daha sonra isə Legend of the Galactic Heroes adı altında 110 bölümdən ibarət əsas hekayəni əhatə edən OVA ekranlara çıxmışdır. Həmçinin daha sonra yan hekayələri əhatə edən film və OVA seriyaları da yayımlanmışdır.

Anime əsasən siyasi ideologiyaların mübarizəsi üstündə gedir. Bir tərəfdə Demokratiya digər tərəfdə isə Avtokratiya özünü təsdiq etməyə çalışır. Militarizm, Patriotizm, Pasifizm, Oxlokratiya kimi terminlərə diqqət çəkərək onları sadə formada izah edir. Əsərin vacib yerlərindən biri isə hekayədə tipik Protaqonist – Antaqonist qarşıdurması yoxdur. Əsərdə sadəcə iki baş qəhramanımız var və hər biri öz yolunda hədəfinə doğru irəliləyir. Kosmik opera tərzində anime sevərlərin də bəyənəcəyi bir əsərdir. Xüsusilə insanlıq tarixi, cəmiyyətin ictimai-siyasi quruluşu haqqında insanı düşünməyə sövq edən nadir əsərlərdən biridir. Yang Wen-li və Reinhard von Lohengramm arasında keçən bu əfsanəvi mübarizə sona qədər insanı valeh edir. Xoş seyirlər.

Ümumi informasiya:
Tip: OVA
Episodlar: 110
Yayım tarixi: 8 yanvar 1988 – 17 mart 1997
Premyerası: 1974-cü ilin qışında
Yayım vaxtı: Bazar günləri saat 19:30 (JST)
Prodüserlər: TV Tokyo, Kitty Films, Tokuma Shoten, Tokuma Japan Communications, Wright Staff
Lisenziya: Sentai Filmworks
Studiyalar: K-Factory, Kitty Film Mitaka Studio
Mənbə: Roman
Janr: Dram, Elmi-fantastika
Mövzu: Yetkin Aktyor Heyəti, Hərbi, Kosmos
Müddət: Hər epizod 26 dəq.
Reytinq: R - 17+ (zorakılıq və vulqarlıq)