1.
Cenevrə gölü, Leman (alm. Genfersee, fr. Lac de Genève, Lac Léman) – isveçrə və Fransada yerləşən göldür. Alp dağlarındakı göllərin ən böyüyüdür. Sahəsi 582 km², uzunluğu 72 km, ən enli yeri 14 km, dərinliyi 310 m-ədəkdir. 372 m yüksəklikdə, Qərbi Alp və Yura dağları arasında qədim buzlaq dərəsində yerləşir. Sahilləri əsasən hündür və sıldırımlıdır. Rona çayı cənub-qərbindən keçir; çayın axını göldən çıxdığı yerdə bəndlə tənzimlənir. Cənub-qərb hövzəsinin çayları qar və buzlaqlardan qidalandığı üçün suyun səviyyəsi yayda qışa nisbətən 1 m-ədək qalxır. Səth suyunun temperaturu yayda 19–24°C, qışda 4–5°C olur. Göl çox mənzərəlidir, iqlimi yumşaq və istidir. Balıqla zəngindir. Gəmiçilik var. Cenevrə, Lozan, Montrö, Veve (isveçrə) və Evyan-leben (Fransa) kimi şəhərləri və kurortlar gölün sahilindədir. Sahilləri boyu avtomobil və dəmir yolları keçir. Turizm inkişaf etmişdir.