1367. azərbaycanda böyük oxucu və yazıçı kütləsini cəlb edə bilməyən sözlük.
bunun bir neçə səbəbi var.

birinci növbədə sözlük yazıçılarının fəal şəkildə yazmamasıdır. hər çıxan yeni(istər beynəlxalq istər yerli) cərəyan və mövzu haqqında isti-isti yazılsa, insanlar azərbaycan dilində məhdud sayda məlumatın olduğu internetdə, sözaltını asanlıqla tapacaq.
bir növ, əlverişsiz şəraiti, üstünlüyə çevirmək üçün çox böyük fürsətdir. gələcəkdə azərbaycan dilli mənbə sayı artanda sözaltı sözlük itib gedəcək internetdə, axtaran da tapa bilməyəcək. əsasən güclü cərəyan yaradan hadisələr əla fürsətlərdir. misal üçün, gündəmdə olan yerli və xarici siyasi hadisələr, prezident ailəsindəki qalmaqallar, epstein faylları, yeni çıxan oyunlar, albomlar, filmlər, və s. insanlar öz dilində hər cürə məlumat tapa bilsə niyə canlanmasın sözlük?

ikinci səbəb birinci səbəbə təsir edir, bəlkə də təməlini qoyur. sözlükdə yazanda çox yazıçı mükəmmələ oynamağa çalışır, həm yazı tərzi olaraq, həm yazdığı məzmun olaraq. istər əjdaha sayı üçün, istər ziyalı görsənmək üçün, və s.
eyni zamanda qorxur və çəkinir. bunlar aydın məsələdir. amma bundan yayınmaq üçün müxtəlif yollar var. bunlardan biri məsələn siyasi məzmunda nə isə yazanda heç kim məcbur etmir müəyyən şəxsin(lərin) adı çəkilsin qeyddə. rəmzi ifadələrdən və jarqonlardan istifadə oluna bilər, hansı ki sözlüyə ruh qatacaq.

üçüncü səbəb, sözlük istifadəçilərinin dostlarına və tanışlarına sözlük haqqında danışmamasıdır. başqa cürə izahı, sözlüyün "underground" qalmasıdır, hansı ki yaxşı bir şeydir. dostlar tanışlar normal olaraq maraqlanacaqlar. sözlük istifadəçi adını bilmək istəyəcəklər yazıçıların və oxuyucuların. bu sözlüyün ruhunu pozacaq amildir. amma hamı sözlüyü azad düşüncə platforması kimi qəbul edib, gizli qalmaq istəyənlərin seçimlərinə hörmətlə yanaşsa, qısaca "underground" bir mədəniyyət yaransa, sözlük məqsədinə çatmış olar.

baş bilən olmaq məqsədim yoxdur, sadəcə şəxsi fikirlərimdir.