Dil qohumluğundan əlavə, sami xalqlarının mədəniyyət və məişət sahəsində də bir çox oxşarlıqları var. Faktlarla təsdiqlənən mülahizəyə görə, Samilərin əcdadları Afrikada Saxara səhrasının şimalında yaşayıblar. iqlimin dəyişməsi ilə əlaqədar onlar e.ə. V minillikdən başlayaraq şərqə doğru hərəkət ediblər və Ərəbistan yarımadasında, Aralıq dənizinin şərq sahillərində, habelə Dəclə və Fərat çayları hövzəsində məskunlaşıblar. E.ə. IV minilliyin sonu – III minilliyin başlanğıcında Samilər dil baxımından Şərq və Qərb qruplarına bölünüblər. Şərq qrupunun sonrakı taleyi Akkad, Babilistan və Assuriya dövlətlərinin tarixi ilə bağlı olub. Qərbi Samilər, öz növbəsində, bir neçə hissəyə ayrılıblar. Amorilər, kənanilər, yəhudilər və aramilər Qərbi Samilərin Fələstin, Suriya və Şimali Mesopotamiyada məskunlaşmış qrupunu (e.ə. III–II minilliklər) təşkil ediblər. Qərbi Samilərin digər hissələri isə (lihyani, səmud və s. tayfalar) e.ə. I minilliyin başlanğıcında “ərəblər” adı altında birləşiblər. Hazırda ərəblər, maltalılar, israillilər, Efiopiyanın amhara, tiqre və b. xalqları Samilərə aid edilir.
şərhlər: