1. Ərəbcə bu "ﺍﻟﻤﺴﻠﺴﻞ ﺍﻟﺤﺪﻳﺚ" formada yazılır. Hədisin sənədində mövcud olan bütün ravilərin hədisin mətnindəki bir sözü və ya feili təkrar etməklə nəql etdikləri hədisdir. Məsələn: Cəbrailin Həzrət Peyğəmbərə dəstəmaz öyrətməsi ilə əlaqədar bir hədis mövcuddur. Bu hədisə əsasən islam Peyğəmbəri Abdullah ibn Məsuda dəstəmaz öyrətdikdə “Qalx, su tök, sənə Cəbrailin necə dəstəmaz aldığını göstərim”, – demişdir. Abdullah ibn Məsud da bunu rəvayət etdikdə, eyni cümləni tələbələrinə demiş və dəstəmaz üsulunu göstərmişdir. Bu hədisi Abdullah ibn Məsuddan rəvayət edən bütün ravilər eyni cümləni və feili təkrarlamışlar. Müsəlsəl hədis ravilərin, hədisin kəlmələrinə və onun nəticəsində formalaşan hərəkətə qarşı həssas davrandıqlarını göstərir.