42. Ölkəmizi elə günə qoyublar ki, sosial şəbəkələrdə azərbaycanlılar Paşinyanın harda bir videosunu görür, başlayır təriflər yağdırmağa. istəsəniz özünüz də maraq üçün baxa bilərsiniz. Bir nəfər azərbaycanlı belə mənfi rəy yazmır.
Bəlkə də buna demokratiya aclığı da demək olar. Həqiqətən Paşinyan ilklərə imza atıb. Birincisi, müharibəni uduzub, amma müharibədən sonra keçirilən seçkilərdə qalib gəlib. indi də bəlkə dünyada analoqu olmayan ilkə imza atır. Müharibə etdiyi, onun hakimiyyəti zamanı 3 min şəhid vermiş ölkənin vətəndaşları ona təriflər yağdırır, onun kimi rəhbər arzulayır.
Seçib-seçilmək hüququ əlindən alınmış, qanunların hakim olmadığı, həyat səviyyəsi ölkəsinin gəlirləri, imkanları ilə uyğun gəlməyən, bir sözlə əhalisinin əksəriyyəti ağır şəraitdə yaşayan ölkənin vətəndaşları elə bir vəziyyətə düşüb ki, uzun illərdir müharibə etdiyi ölkənin rəhbərinə həsəd aparırlar, təriflər yağdırırlar. Əslində bu hal hakimiyyətə ciddi siqnal olmalı idi, olmur.

©Fərəc Kərimli