2. timidus qardaşın tapdığı siyahıda (#73406) baxmadığım 3 filmdən biri "the return" a bu gün baxmaq qismət oldu. ilk öncə deyim ki, andrey zvyaqintsevin 39 yaşında çəkdiyi bu film çəkildiyi ildə bütün beynəlxalq mükafatları demək olar ki, qazanıb. psixoloji dram janrındadır. 12 ildən sonra evə dönən ata iki oğlu ilə birlikdə səyahətə çıxır. bu səyahət onlar üçün bir - birini tanımaq baxımından yaxşıdır, amma münasibətlər gərgindir. ata biraz kobud, az danışandır, balaca oğlu ivan hər şeydən şübhələnən və inadcıl biridir. böyük oğul andrey isə illər sonra dönən atasına balaca qardaşından daha yaxşı münasibət bəsləyir, ona isinişməyə çalışır.

filmdəki göl səhnələri sankt peterburq yaxınlığındakı ladoqa gölündə çəkilib. rusiyanın gözəl təbiət mənzərələrini rejissor müxtəlif rakurslardan tamaşaçıya əla çatdırır, həzz alırsan, gözlərin dincəlir. film bitdikdə ağlında bir çox sual qalır. ata bu 12 ildə hardaydı? uşaqlarını sevirdimi yoxsa sadəcə maraq üçün və ya analarının xahişi lə onlarla vaxt keçirirdi? qayığa qoyulan o aparatda nə vardı? və s və s. bu sualların bəzilərinə cavab tapmaq olur qismən, amma bəzi suallar cavabsız qalır, film bitdikdə təsiri o qədər güclü olur ki, heç bu suallara cavab tapmamağa çalışırsan. bəlkə də bir neçə gün sonra film yada düşdükdə bu barədə fikirləşəcəksən.

filmdə ən təsirli səhnələrdən biri:


--spoiler--

uca qülləyə çıxan balaca oğlu ivanın dalınca çıxan ata ivanın qüllənin qapısını bağlaması səbəbi ilə yanına gedə bilmir. qüllənin kənarından ona yaxınlaşmaq istədikdə çürük taxta qopur. həmin anda atanın gözləri oğula başqa cür baxırdı elə bil. bu ölümdən və yıxılmaqdan qorxan bir baxış deyildi, sanki nəsə indiyə qədər demədiyi bir söz demək istəyirdi oğluna.

--spoiler--

filmdəki böyük qardaş andrey obrazını canlandıran aktyor vladimir garinin filmin çəkildiyi ildə 16 yaşında vəfat etməsini eşitdikdə çox üzüldüm.