1. almaniyanın ən qədim şəhəri. rheinland-pfalz federativ torpağında yerləşir. hal-hazırda şəhərin təxminən 108 min əhalisi var. sahəsi o qədər də böyük olmayan şəhər qədim tarixi və rəngarəngliyi ilə məşhurdur.

şəhəri çox məşhur edən əsas səbəb isə karl marksın məhz bu şəhərdə doğulmuş olmasıdır. karl marx haus adlandırılan ev müzeyi əsasən çinli turistlərin "qibləsinə" çevrilib.

şəhər vaxtilə romalıların əlində olub deyə, şəhərdə olan köhnə abidələrin əksəriyyəti romalılarla əlaqədardır. bunlara porta nigra adlı şəhərə giriş funksiyalı qalanı, amfiteatrı, kaiserthermen adlı termal hamamı, konstantinbasilika kilsəsini və s. abidələri misal göstərmək olar.

şəhərin içərisindən keçən mosel çayı tarixən şəhərin formalaşmasında rol oynamışdır. məşhur mosel çaxırı öz adını bu çaydan götürmüşdür. şəhərin özündə və ətrafında weingarten adlandırılan üzüm bağları var ki, bu da trierdə istehsal olunan çaxırın hazırlanması üçün istifadə edilir.

şəhərdə 2 universitet var; universität trier və fachhochschule trier.

balaca şəhər olmasına baxmayaraq məşhur trier karnavalı hər il minlərlə qonağı qəbul edir.

hər il təşkil olunan fia dünya ralli çempionatının bir mərhələsi də məhz burada keçirilir. (baxma: wrc)