klab games-in hazırladığı, bleach animesinin dünyasında keçən mobil aksiyon rpg oyunu. ichigo, rukia, byakuya və digər tanıdığımız bütün shinigamilərin əlindən tutub sən də meydana girməyə çalışırsın amma bir vaxt döyüşdən sonra bilet qurtarır, oturub gözləyirsən.
gacha sistemi üzərində qurulub. yəni pul yoxdursa, xoşbəxt olmaq üçün səbr lazımdır. çox səbr. kosmik miqyasda səbr. beş ulduzlu karakter çıxartmaq üçün çəkdiyin əzab sənə ruhani gücün nə olduğunu anladır, amma o güc həyəcanın deyil, məyusluğun gücüdür.
döyüş sistemi sadədir: ekrandakı düymələrə vurursan, düşmən ölür. yaxud sən ölürsən. hər iki halda nə baş verdiyini tam anlamırsan, çünki effektlər o qədər çoxdur ki, ekran bir anlıq partlamış konfet fabrikini xatırladır.
co-op rejimi var, başqaları ilə oynayırsan. amma əksər hallarda iki nəfər birlikdə bossu öldürür, üçüncü adam arxada dayanıb telefona baxır. o adam çox güman ki, sənin tanışındır.
pvp hissəsinə girəndə anlamağa başlayırsan ki, oyuna pul xərcləyən insanlar başqa bir kainatda yaşayır. sən hər zərbəni əziyyətlə vurursan, o adam bir toxunuşla səni silib gedir. bu demokratiya deyil.
bir müddət sonra yeni karakter paketi çıxır. məsələ budur ki, bu paket həmişə əvvəlki "ən güclü" karakteri köhnəldir. oyun sənə deyir ki, üç ay əvvəl aldığın şey indi karton oyuncaqdır. kapitalizmın ən xalis forması.
bütün bunlara baxmayaraq bleach animesini sevən (yəni mən) oynayır. çünki baş kapitan qılıncı əlində tutub bankai formu azad edəndə gələn səs effekti, insan övladının içindəki on dörd yaşlı uşağı yenidən oyandırır.
nostalji bir gücdür, klab games bunu çox yaxşı bilir. illərdi təhsil və işə görə müəyyən fasilələrlə oynamışam amma artıq boş zamanım çox olacaq. Bu dəfə daha mütəmadi oynamaq istəyirəm. yəqin ki, boş vaxtlarımı ancaq ona xərcləmək üçün sözaltını atıb tam ona fokuslanacam.