İtaliyada məşhur rəssamlar Pyer-Ogüst Renuar, Pol Sezan və Anri Matisin Parma yaxınlığındakı Manyani-Rokka Fondunun şəxsi muzeyindən üç rəsmini oğurlamaqda şübhəli bilinən Moldova əsilli üç şəxs həbs edilib. "Report"un ANSA-ya istinadən məlumatına görə, bu barədə karabinerin incəsənət cinayətlərini araşdıran xüsusi bölməsi xəbər verib. Hüquq-mühafizə orqanlarının məlumatına görə, oğurlanmış üç əsər tapılıb və muzeyə qaytarılıb.
Onların ümumi dəyəri 9 milyon avro qiymətləndirilir. "Karabinerlər 23 martda Manyani-Rokka Fondunun muzeyindən Pol Sezan, Pyer-Ogüst Renuar və Anri Matisin oğurlanmış üç qiymətli əsərini geri qaytarıblar", - Parmanın karabineri "X" sosial media hesabında açıqlamasında bildirilir. Xatırladaq ki, rəsmlər martda oğurlanıb.
Oğrular Luici Manyaninin (1906-1984) şəxsi kolleksiyasının yerləşdiyi Manyani villasının qapısını sındırıblar. Söhbət Renuarın son əsəri olan "Balıqlar", Sezanın "Albalı ilə natürmort" və Matisin "Terrasdakı xanım" akvarel əsərlərindən gedir. İncəsənət tarixçisi və kolleksiyaçı Luici Manyaninin adını daşıyan fondda onun Titian, Dürer, Rubens, Qoya, Kanova, Mone və digər tanınmış rəssamların əsərlərini özündə birləşdirən kolleksiyası saxlanılır.
Kolleksiya İtaliyanın ən əhəmiyyətli şəxsi sənət kolleksiyalarından biri hesab olunur.
Extract — continue reading at the source.
