Azərbaycanın Baş prokurorluğunun Rusiya vətəndaşları – "Moskva 24" telekanalının aparıcısı, jurnalist İvan Knyazev, Rusiya Federasiyasında siyasi məsləhətçi və media eksperti kimi özünü təqdim edən Semyon Uralov və televiziya jurnalisti və müxbiri kimi fəaliyyət göstərən, Rusiya Federasiyası nəqliyyat nazirinin müşaviri Aleksey Çadayev barəsində İnterpol kanalları vasitəsilə beynəlxalq axtarışının təşkili istiqamətində zəruri tədbirlərin görməsi barədə məlumat yayılıb. "Report"un məlumatına görə, adıçəkilən şəxslər Azərbaycan Respublikasının konstitusiya quruluşunun zorla dəyişdirilməsinə, ərazi bütövlüyünün parçalanmasına, milli nifrət və düşmənçiliyin salınmasına, habelə terrorçuluğa açıq çağırışlarda ittiham edilirlər. Onlar barəsində cinayət işi başlayıb və həmin şəxslərin Azərbaycan Respublikasının hüdudlarından kənar olduqları nəzərə alaraq, onlar barəsində axtarış elan olunaraq məhkəmənin müvafiq qərarları ilə barələrində həbs qətimkan tədbiri seçilib.
Məsələnin mahiyyəti adıçəkilən şəxslərin 2026-cı ilin iyulun 14-ü və avqustun 13-də "YouTube" platformasında "Семён Уралов" adlı kanalda yayımlanan "Чистота понимания" verilişində Azərbaycan Respublikasına qarşı zorakı üsulların tətbiq edilməsi, o cümlədən ayrı-ayrı şəxslərin birbaşa fiziki məhvetmə təhlükəsi altında saxlanılması və ünvanlı şəkildə sıradan çıxarılması barədə fikirlər səsləndirərək terrorçuluğa açıq çağırışlar etmələrindədir. Dörd il yarımdır Ukraynada buynuzları və dişləri sınan velikorus şovinistləri revanşı keçmiş SSRİ-nin digər respublikaları və onların dövlət başçılarından almaq niyyətində olduqlarını gizlətmək istəmədiklərini verilişlər boyu nümayiş etdirirlər. Keçmiş imperiyanın nostaljisi ilə yaşayan bu tip şəxslərin gətirdikləri absurd arqumentlərə bəlkə də fikir verməmək olardı.
Belə ki, proqramda jurnalist-ekspert kimi iştirak edənlər Rusiyada bu qismdə fəaliyyət göstərən yüzlərlə boşboğazlardan biridirlər. Amma verilişdə olanlardan birinin Rusiyanın rəsmi şəxsi olduğunu, daha konkret desək nəqliyyat nazirinin müşavirinin olmasını nəzərə aldıqda, demək olar ki, ya həmin şəxs nə dediyini bilmir, ya da orada səslənən fikirlər heç də təkcə həmin şəxslərin beyinlərinin məhsulu deyil və Kremlin hansısa qulləsinin rəsmən ifadə edə bilmədiyi fikirlərdir. Verilişdə deyilənləri qısaca icmal etsək qeyd edə bilərik ki, iştirakçılar Ukrayna ilə normal münasibət saxlayan keçmiş post-sovet məkanına daxil olan ölkələrin dövlət başçılarının buna görə cəzalandırılmalı olduqlarını bildirirlər və Rusiya ilə hansısa danışıqların pozulduqlarını bəyan edirlər.
Hüququ çərçivə kimi isə "ekspertlər" dövlət başçılarının keçmiş SSRİ dövründə anadan olduqlarını və ona görə də olmayan dövlətin qanunlarına tabe olmalı olduqlarını bəyan ediblər. Bu şəxslər hesab edirlər ki, Rusiyanın post-sovet məkanında istənilən şəxsin özünün qanunlarına uyğun mühakimə etməyə ixtiyarı var. Ən acı gülməlisi isə Rusiyada ədalət məhkəməsinin olduğunu iddia etməkdir.
Bu ölkədə məhkəmənin ədalətinə Yekaterinburqda azərbaycanlıların başına açılan oyundan sonra inanan ancaq həddən artıq sadəlövh insan ola bilər. Və ya elə bu yaxınlarda seçkilərdə qeydə alınan "Yabloko" partiyasının müharibə əleyhinə şüarlarla çıxış etməsindən sonra absurd arqumentlərlə qeydiyyatının ləğv olunması Rusiyada məhkəmə və ədalət ifadələrinin biri-birinə tam əks olduğunu nümayiş etdirdi. Rusiya dövlət rəhbərliyinin Haaqa Beynəlxalq Cinayət Məhkəməsi tərəfindən axtarışa elan edilməsi faktını yaddan çıxaran bu tip ekspertlər post-sovet məkanına daxil olan dövlətlərin başçılarını təqib etmək kimi hüquqa malik olduqlarını iddia edirlər.
SSRİ-nin 30 ildən çoxdur dağılmasına baxmayaraq Rusiyada bir sıra insanlar hələ də hesab edirlər ki, bu məcburi ittifaqa daxil olmuş, hazırda müstəqilliklərini bərpa edən dövlətlər bütün strateji addımlarını Kremllə razılaşdırmalı, daxili və xarici siyasətlərini onlarla uzlaşdırmalı, necə yaşamalı olduqlarını, hansı kursu seçmələrini məsləhətləşməli, kiminlə dostluq etməli olduqlarını Moskvadan icazə almalıdırlar. Ukrayna torpaqlarında güclü, nəhəng dövlət mifini itirən, son 26 ildə dünyada qazandığı siyasi və iqtisadi mövqeləri qısa müddətdə əldən verən, beynəlxalq aləmdə təcrid edilmiş ölkələri özünə strateji əməkdaş bilən dövlətin vətəndaşları olan bu ekspertlər hələ də anlamaq qabiliyyətində deyillər ki, indi 1920-ci il deyil. O dövrün üzərindən 100 il keçib və bu əsr ərzində Rusiyanın özünün arxa baxçası hesab etdiyi ölkələr müstəqil xarici siyasət yürüdüb, heç kimdən icazə almadan dostluq etmək istədikləri dövlətləri seçə bilərlər.
Extract — continue reading at the source.
