Jack not the Ripper


18   6   0   0
10.nəsil yazar
entry: 18
reytinq: 87
karma: 475
izləyən: 2
oxunma: 30,371






sözlük yazarlığının anonimliyi

Gecə-gecə ağlıma gələn mövzudur. Yazılarını oxuduğum, fikirlərini bəyəndiyim və ya bəyənmədiyim şəxslər görəsən kimdir, və ya realda tanıdığım kimlər burada nələr yazır deyə düşündürür. Bir möcüzə olsa da, anidən öyrənsəm hamısını deyirəm.
Amma ümumiyyətlə iki nəfər xarici hamı anonimdir mənim üçün, onlar da ki, özləri pozub anonimliyi. Mən isə bildiyim qədərilə hamı üçün anoniməm

intihar etməmək üçün səbəblər

Ailə.
Sonradan yaşayacaqları çətinliklər;ağrı,şübhə,anlaşılmazlıq,çarəsizlik,qınaq,qorxu,nifrət,peşmanlıq,utanc, və s.
Özü üçün yaşaya bilməyən insanın özü üçün heç ölə də bilməməsi

mükəmməl sözlər

“Villainy wears many masks; none so dangerous as the mask of virtue.”
— Washington Irving

"Those who do not move, do not notice their chains."
— Rosa Luxemburg

Tanımadığın biri ilə dərdləşmək

işim.
Bu tələbat hər bir insanda müəyyən zamanlarda ortaya çıxır. Amma bu sahədə çalışanda insan anlayır ki, əslində nə qədər insanın danışmağa heç kimi yoxdur. Dostları, yaxınları olsa belə, müəyyən səbəblər - qınanmaq qorxusu, gizliliyinin ifşasından narahat olmaq, anlaşılmayacağını düşünmək və s. insanları məcbur edir ki, ürəyindən keçənləri heç kəslə bölüşməsin. Və içəridə yığılanlar isə zamanla çox ağırlaşır və müəyyən problemlərin ortaya çıxmasına səbəb olur.
Qarşınızdaki insanın sizə verə biləcəyi məsləhətlərdən asılı olmayaraq, bu ağırlığı ata bilmək danışmağın müsbət cəhətlərindən sadəcə biridir. Adicə səsli olaraq bunları dilə gətirmək belə əlavə fikir qazandıracaq sizə, dəfələrlə beyində fırlanan bir fikri səsli deyərkən ona başqa bir prizmadan baxmanız mümkündür.
Təbii ki, hər insan üçün hansısa professionaldan kömək almaq bir variant deyil (inamsızlıq, vaxt azlığı, maddi problemlər və s), buna görə də, ən azı görsəz ki, gücünüz çatmır, bir vərəq götürüb yazın, daha sonra bunu parçalayın.

köhnə sevgili

Bu gün doğum günü olan şəxsdir.
Bir neçə il öncə bərabər xəyallar qurulan, indi isə yeni yaşını, yeni ilini fərqli bir ölkədə, yeni dostları və yeni sevgilisi ilə qeyd edən insandır.
Hələ də uzaqlardan xatırlansa da, özünün heç ağlına gəlmədiyim insandır.
ilk və son dəfə xəyallar qurdurmuş, bu xəyalların reallaşa biləcəyinə inandırmış, əsla getməyəcəkmiş hissi vermiş, sonra yox olub getmiş insandır.
Şəhərin ən məhşur yerlərindən birində ayrılmışdı məndən, 4 il sonra hələ də o yerdən keçəndə o soyuq günü xatırlayıram.
Dərdindən ölmürəm, ən böyük ağrım, nə də ən böyük arzum deyilsən, amma bir yerdə dərin bir yara açmısan. Xatırlanırsan, amma ağlımda sənə dair çox mənfi fikirlər var artıq. inan ki, həqiqətdə var olan sənin məndə zərrə dəyəri yoxdur, sən özünü mənə çox fərqli tanıtmışdın. Xatırlanmanın tək səbəbi isə, hər xırda detalı belə yadda saxlayan bir hafizəm və həddən artıq overthinker olmağımdı.

Edit: bütün bunları bura yazıram, çünki yığılıb qalıb və başqa heç kimə danışa bilmərəm.

Edit 2: Psixoloqa getməyə də pulum yoxdu

insanı əsəbləşdirən şeylər

insanlar.
Minlərlə davranış və xarakterə sahib növlərini saymaq mümkündür. Məsələn:
ictimai nəqliyyatda həddən artıq yüksək səslə söhbət edən və ya telefonla danışan;
Yerə zibil atan - zibil qutusu olsun və ya olmasın buna heç nə bəhanə deyil;
Hər hansı bir sahədə ona xidmət göstərən şəxsə qarşı kobud, hörmətsizcə davranan, onu özündən aşağı hesab edən;
Yolda buna səbəb olacaq yaşı və ya fiziki problemi olmadığı halda yavaş yeriyən;
4-5 nəfər yan-yana gedib yolu kəsən;
Piyada keçidində piyadaya yol verməyən və ya zolağın üzərində saxlayan;
Piyada keçidində parkda gəzintiyə çıxmış kimi yeriyən;
Nəqliyyata minərkən düşənləri gözləməyib enərkən hamını itələyən;
Özünə aid olmadığı halda hər işə qarışıb soruşulmadığı halda fikir bəyan edən, "məsləhət verən";
Öz həyatından çox başqalarının həyatlarına burnunu soxan;
Özünü dünyanın mərkəzi hesab edən, istənilən mövzunu özünə aid edən, hər söhbəti öz özürinə yönləndirən, dərdini danışana belə "mənim dərdim səninkindən böyükdür" deyən, sanki kainatın mərkəzi odu, bütün planetlər ətrafında fırlanırmış kimi zənn edənlər; və s.
Siyahını çox uzatmaq mümkündür.

borc

Həm verilməsi, həm də alınması sıxıntı səbəbi.
Borca ehtiyyac duyacaq vəziyyətə düşmək onsuzda çətindir. Bu sıxıntılarla boğuşmaq, axtarmaq, istəmək, sıxılmaq, boğulmaq, qaytarana qədər ağlından çıxmaması filan yük olur insana.
Bir də borc vermək var ki, bu da ayrı bir bəladır. Ya öz verdiyivin dilənçisi olacaqsan, ya da çox halda geri qayıtmayacaq. Burda söhbət təkcə puldan getmir, geyim, kitab, əşya - hər hansı bir şey ola bilər. Hələ də sözünü deməkdən utanan insansınızsa, vay halınıza. Bezib, məcbur qalıb istəyəndə də bəzən elə üz göstərirlər, sanki siz borclusuz.
Ən yaxşısı mümkün qədər uzaq durmaqdır

pms

Əziyyət, bəla, həssaslıq, dözüm həddinin aşağı enməsi.
Fantastik seriallarda, filmlərdə vampirə və ya qurd adama yeni-yeni çevrilməni necə izah edirlər - ən adi səslərin həddən artıq çox gəlməsi, qulaqda cingilti, başda fırlanma, ürəyin həddən artıq sürətli döyüntüsü, hər şeyin qıcıq yaratması, toxunanı öldürmə instinkti - bunların hamısı və daha artığı.
Kaş ki, kişi olaraq doğulardım istəyinin artması ilə nəticələnən prosses

intihar simptomları

Çox zaman gizli simptomlardır.
Diqqət etsəz, intihar edən bir insanın ardından çox zaman "çox şən, tanıdığım ən gülərüzlü insan idi, heç düşünməzdim belə bir şey edər" kimi sözlər deyilir. Ən yaxınında olanlar dərdlərini bilsə belə, adətən bu qədər sərt addımı gözləmir. Bunun müxtəlif səbəbləri var, bildiyim ikisini qeyd edəcəm.
Birincisi, bu insanlar o qədər dərin bir çöküşdə olur ki, bədənləri fiziki olaraq yorulur dərdlərdən, buna görə də hər fürsətdə qaçış axtarırlar. insanların əhatəsinə düşdükdə, bir az başları qarışdıqda dərhal gülnəyə başlayırlar. Həddən artıq emosianal ruh halında olduqları üçün, melanxoliyadan şənliyə keçmələri saniyələr çəkir və əksinə, ki bu özü də psixoloji çöküşün işarəsidi. Beyin artıq mənfi yüklənmədən qaçış axtarışındadır.
ikincisi isə, artıq susmağa başlamalarıdır. Nə vaxta qədər ki, ətraflarında olanlara hisslərini, hallarını danışa bilirlər, müəyyən qədər yüngülləşirlər və davam gücü tapırlar. Amma nə vaxt ki, artıq danışmağa belə halları qalmır, bundan belə vazkeçirlər, bu ən təhlükəli məqamdır. Adətən dərdli, bikef, halından narazı adamları "depressiyadadır" deyə adlandırırıq. Əslində isə depressiyanın ən önəmli simptomlarından biri özünə qapanma və susmaqdır.

ana olmaq istəməyən qadın

Digər qadınlardan fərqlənməyən qadındır. Ana olmağı istəməyə məcbur olmadığının fərqində olan qadındır. Yaşayırsansa "mütləq ki, əhalinin sayını artırmaq lazımdır, nəsli davam etdirmək lazımdır" kimi gərəksiz düşüncələrdən uzaq olan insandır.
Övlad sahibi olmaq da digər hər şey kimi insanın şəxsi istəklərindən asılıdır, şərt və ya məcburiyyət deyildir. Eyni zamanda isə üzərində ən çox düşünülməli olan qərardır. Ancaq istəyirsən deyə, valideynlərin gözləyir deyə, və s səbəblərdən, bu məsuliyyətə tam hazır olmadan əsla bu qərar verilməməlidir.

davamlı dava edən ailədə böyümək

Vaxtından tez böyümək, yarımçıq yaşanan uşaqlıq, özünə və hər kəsə nifrətlə keçən yeniyetməlik, özgüvənsiz davam edən gənclik, və bünövrəsi çalxantılı yetkinlik. Özündə qüsur bildiyin bir çox cəhəti belə analiz etdikdə kökündə duran travmaların olduğunu dərk edirsən. Psixologiyaya önəm verilməyən bizimki kimi toplumlarda "uşaqdı, heç nəyi anlamır" kimi gülünc fikirlər olsa da, uşaqlar yanlarında keçən ən adi söhbəti belə unutmur. Yaş artdıqca vecsizləşirsən, çox şey adiləşir. Amma azyaşlının eşitdiyi hər acı söz şüuraltına işlənir.

sözlüyə geri qayıtmaq

4 - 5 ildən sonra baş verən hal. Adı tanış gələn 1-2 adamın entrysini görüb sevinməyə səbəb yaradan vəziyyət. Əvvəlki nikimi belə xatırlamasam da, eyni anda həm doğmalıq, həm yadlıq hiss edilir.

/ 20 »

blok -   başlıqlarını gizlət