passiv-aqressiv şəxsiyyət pozuntusu

Passiv-aqressiv şəxsiyyət pozuntusuna sahib olan insanların əsas özəlliyi yox deyə bilməmək, hər hansı vəziyyətə, şəxsə qarşı olduğunu açıqca göstərə bilməməkdir. Bu şəxslər aqressiyalarını dolayı yolla (küsmək, bəhanələr yaratmaq, başqalarını günahlandırmaq, üz ifadəsinin dəyişməsi və s) ifadə etməklə, qarşı tərəfin onların duyğularını anlamasını gözləyirlər. Onlar həyatlarında olan problemlər üçün başqalarını günahlandırırlar. Onun əlamətlərinə daxildir:
1)Ən xırda şey üçün incimək;
2)Tez-tez dəyişən duyğu və hərəkətlər;
3)Çevrədəki insanların pis olduqlarını düşünmək;
4)insanlar tərəfindən yetəri qədər dəyər görmədiyini düşünmək;
5)Başqalarının uğurlarını qısqanmaq, tənqid etmək;
6)Duyğularını açıq ifadə etmək yerinə, imalar etmək
Passiv-aqressiv şəxsiyyət pozuntusunun dəqiq müəyyən olunmuş səbəbi yoxdur. Buna uşaqlıqda alınan travmaların, valideynlərin davranışlarının səbəb olduğu düşünülür. Belə ki, ailədə yetəri qədər diqqət görməyən, tutarsız rəftarla rastlaşan uşaqlar aqressiyalarını ifadə edə bilməyərək bunu içlərində yaşayırlar. Özünü ifadə yollarını yaratmağa imkan verilməməsi irəlidə passiv-aqressiyaya səbəb olur

nənə

Necə başlayım, hardan başlayım bilmirəm. Həyatım boyu sahib olduğum ən dəyərli insan haqqında necə danışmalı olduğumu, onun hələ də qəbullana bilmədiyim ölümünü necə təsvir edə biləcəyimi bilmirəm. Atam, anam, dostum saydığım səni itirəndə 11 yaşımda idim. Ölümünü anbaan gördüyüm tək insan idin. Uşaq olduğum üçün xəstəliyinin hansı dərəcə ağır olduğunu anlamırdım, nənə xəstədir, sağalacaq deyirdilər. Hər yay olduğu kimi bu dəfə də yanına gəlmək üçün səbirsizlənirdim. Həyətin darvazalarını açıb bizi gözləyən nənəmi bu dəfə arabada, ağ saçlı və sümükləri çıxmış halda görmək ağır idi. Ani reaksiyalar verməyin, narahat olmasın dedilər deyə sanki heç nə olmamış kimi davrandıq. Evdə şüşə olan hər yerin üstünü örtmüşdülər, sən özünü görməyəsən deyə. Son ana kimi ümid etdilər, bəlkə sağalar dedilər. Günlər keçdikcə daha da pisləşirdin, hər zaman olduğu kimi güclü davranmağa çalışırdın. Peşmanam, nənə. Sənlə çox vaxt keçirmədiyim üçün, o dönəmində həyətdə oynamaq yerinə hər dəqiqə yanında oturmadığım üçün. Can verəndə düz sağında oturub əlini tutsam da, o an nə baş verdiyini tam dərk etmirdim. Səni itirdiyimi həmişə getdiyimiz ev satılanda, qapısı bağlı olanda, zəng edib “nənə sənə nə göndərsin, balam” deyən olmayanda, hər xoş anımda telefonumu əlimə alıb yığmağa nənəmi tapmayanda, öləndən sonra özümlə gətirə bildiyim şəklini, eynəyini, şərfini illər sonra görəndə anladım. “Bütün nəvələrimi sevirəm, amma immortal tamam ayrıdır mənim üçün” deyərdin.
Kaş hər şeyi özün həll etməyə çalışmasaydın, xəstəliyini gizlətməsəydin, göz ardı etməsəydin. Bəlkə də tək dərdin insanlara yük olmamaq idi (özünün də dediyin kimi). indiyə qədər haqqında 1 nəfərdən belə mənfi fikir eşitmədim, bir insanın heç mi nifrət edəni olmaz? Səndən sonra hər şey dağıldı, nənə. Artıq əvvəlki qədər toplaşmırıq, əvvəlki mehribanlıq yoxdur. Hər kəsi bir araya yığan sən imişsən. Duyğusal insan deyiləm, insan ölümləri mənə təsir etmir. Bir tək hər hansı ortamda xərçəngdən bəhs olunanda bir yerlərə dalıram. Bir dəfə zəng edib dedin ki, “nə yaxşı öz videonu çəkmisən mənim telefonumla, baxıram darıxanda ”. indi mənim darıxanda baxa biləcəyim, səsini eşidə biləcəyim videon yoxdur. Toplam 4-5 dəfə yuxuma girmisən bu illər ərzində (sadəcə çətin anlarımda). Çətində deyiləm, amma yenə gəl yuxuma, çünki darıxıram. Doğum günümüz eyni gündə idi, “immortal lap hədiyyə olub ki sənə” deyiblər mən doğulanda. Hər ad günümdə sən yanımdasan deyə düşünürəm. Bu gün kiçik də olsa bir şeylər edirəmsə, əmin ol böyük hissəsi sənin xətrinədir. Həkim olmağımı istəyirdin, olmadım. Amma bu halımı da görsən, məncə qürur duyardın. Elə ən çox sən qürur duyardın mənlə (həmişə etdiyin kimi)

bakıda olan qalereyalar

Getmək istəyənlər üçün bildiyim qalereyaları yazmaq istədim. Öncəliklə hamısına giriş pulsuzdur. Hər birinin instagram səhifələri var, tam ünvanları yazılıb. “Yarat” və “Gazelli” xaric digərləri içərişəhərdə yerləşir. Ən sevdiyim Artım adlı olan ilə başlasaq, burda hər ay sərgilər yenilənir. Şəkil çəkməyə icazə var. işçiləri səmimi, rahatdırlar. Gazelli art house sərgilərini bəsit olduğu üçün sevmirəm (1-ci günlər bağlı olur). içəridə eyni adlı restoran da var. Zaman qalereyası yeni açılıb, şəkil çəkməyə icazə verilmir. Artımdan sonra “Medina gallery” favorimdir. Ordakı işçi sizə əsərlər haqqında məlumat verir (istəsəniz), şəkil, video çəkməyə qarışmırlar. Uyğun qiymətə əsərlər də satılır. Bakı rəsm qalereyasında milli mövzulu əsərlər olur. Q gallery, Nur art house mənə sıradan gələn qalereyalardır. Yarat Bayılda yerləşir, 1-2 ayda sərgilər yenilənir. Bura getsəniz, yanındakı daş salnamə muzeyinə də gedə bilərsiniz

milli məclis

Hakimiyyətlərin bölgüsü prinsipinə görə dövlət hakimiyyəti qanunverici, icra və məhkəmə olmaqla 3 qoldan ibarətdir. Qanunverici hakimiyyət parlamentə (Milli Məclisə) məxsusdur. Milli Məclis xalqın iradəsini ifadə edən orqandır. 2 əsas funksiyası var: qanunvericilik (qanun qəbul etmək) və nümayəndəlik (xalqı təmsil etmək). Milli Məclisə seçkilər majoritar qaydada keçirilir. 125 deputatdan ibarətdir. Yalnız Azərbaycan vətəndaşı olan, seçkidə iştirak etmək hüququ olan şəxslər deputatlığa namizəd ola bilərlər. Deputat seçilə bilməyən şəxslərə daxildir: ikili vətəndaşlığı olanlar, başqa dövlət qarşısında öhdəliyi olanlar, din xadimləri, fəaliyyət qabiliyyəti olmayanlar, ağır cinayətlərə görə məhkumluğu olanlar və s. Azərbaycan unitar ölkə olduğu üçün parlament birpalatalıdır. Milli Məclisin tərkibinə daxil olan daimi komissiyaları var (iqtisadi siyasət, hüquq siyasəti, mədəniyyət məsələləri və s. daimi komissiyalar). Onların əsas vəzifələri qanun layihələri hazırlamaqdır. Səlahiyyətləri:
1)Prezidentin təqdimatı ilə Azərbaycanın diplomatik nümayəndəliklərinin yaradılması;
2)Prezident təqdimatına əsasən dövlət büdcəsinin təsdiqi, onun icrasına nəzarət;
3)Ölkənin inzibati ərazi bölgüsü;
4)Ombudsmanın seçilməsi;
5)Referendum təyin edilməsi;
6)Amnistiya;
7)Hökumətlərarası müqavilələrin təsdiqi, ləğvi və s.

avropol

Tam adı Avropa Polis təşkilatıdır. Avropa ittifaqı ərazisində cinayətkarlıqla mübarizə üçün yaradılmışdır. 1999-cu ildən fəaliyyət göstərir. Müstəqil hüquq subyektliliyinə malikdir, yəni ittifaqa daxil olmayan dövlətlər, beynəlxalq təşkilatlarla özü münasibətlərə girə bilər. 2009-cu ilə qədər dövlətlərdən üzvlük haqqı alınırdı, hazırda ittifaq tərəfindən maliyyələşdirilir. Avropol bütün cinayətlərlə deyil, yalnız beynəlxalq cinayətkarlığın ciddi formaları ilə bağlı məsələləri həll edir. Bu tip cinayətlərin 3 əsas cəhəti olmalıdır:
1) mütəşəkkil qruplar tərəfindən təşkil;
2) cinayətin 2 və ya daha çox dövlətə zərər vurması;
3) üzv dövlətlərin birgə tədbir görmələrinin zəruriliyi.
Həmin cinayətlərə insan alveri, terrorçuluq, narkotik vasitələrin qanunsuz satışı, pulların yuyulması, qanunsuz silah alveri, girov və s. aiddir. Qərargahı Haaqada yerləşir