Qazaxıstanın Türküstan vilayətinin Sayram rayonunda Avstraliya texnologiyası ilə heyvandarlıq birjasının tikintisinə başlanılıb. Bu barədə vilayət administrasiyasının mətbuat xidməti məlumat yayıb. Layihə RED GOLD LLP tərəfindən həyata keçirilir və kənd təsərrüfatı sektorunun inkişafına dəstək vermək və region iqtisadiyyatını şaxələndirmək üçün nəzərdə tutulub.
"RED GOLD mal-qara birjası ölkəmizdə analoqu olmayan irimiqyaslı və mühüm layihədir. Bu layihə Türküstan bölgəsinin investisiya potensialının artırılması, kənd təsərrüfatının yeni səviyyəyə qaldırılması və regionun iqtisadiyyatının şaxələndirilməsinə yönəlmiş mühüm təşəbbüslərdən biridir", - deyə Türküstan vilayətinin sədri Nurlaxan Kuşərov kapsul qoyma mərasimində bildirib. Layihə çərçivəsində Avstraliya şirkətlərindən kommersiya təklifləri daxil olub və müvafiq işlər davam etdirilir.
Obyektin metal konstruksiyaları Türkiyənin “Agro Fine” şirkəti tərəfindən istehsal olunur. Layihənin ümumi dəyəri 5,2 milyard tenge (təxminən 11,2 milyon dollar) təşkil edir. Layihə 24 hektar torpaq sahəsini əhatə edir.
Tikinti materiallarının təxminən 30%-nin Avstraliyadan, qalan 70%-nin isə Türkiyədən tədarük ediləcəyi gözlənilir. Artıq tikinti sahəsində hazırlıq işlərinə və təməl işlərinə başlanılıb. Layihənin 2026-2027-ci illərdə başa çatdırılması planlaşdırılır.
Heyvandarlıq birjası tam fəaliyyətə başladıqdan sonra eyni vaxtda 5 min baş iribuynuzlu mal-qara, 4 min at və 10 min baş xırdabuynuzlu mal-qaranı qəbul etmək mümkün olacaq. Mənbə: https://www.trend.az/casia/kazakhstan/4215365.html © 2026 Trend İnformasiya Agentliyi.
Xülasə — davamını mənbədə oxuyun.
