Əmək və Əhalinin Sosial Müdafiəsi Nazirliyinin tabeliyindəki DOST Agentliyində ölkəmizdə səfərdə olan Seneqal Respublikasının dövlət qulluğu, əmək və ictimai xidmətlərinin islahatı nazir Mamadou Lamine Diantenin başçılıq etdiyi nümayəndə heyəti ilə görüş olub.
Bu barədə APA-ya ƏƏSMN-dən məlumat verilib.
Bildirilib ki, nümayəndə heyəti əvvəlcə DOST Agentliyinin 1 saylı DOST Mərkəzi ilə tanış olub Əmək və əhalinin sosial müdafiəsi naziri Anar Əliyev Prezident İlham Əliyevin 9 avqust 2018-ci il tarixli Fərmanına əsasən yaradılan DOST Agentliyi və DOST Mərkəzləri haqqında məlumat verib. Birinci vitse-prezident Mehriban xanım Əliyevanın təşəbbüsü ilə DOST konsepsiyasının dövlət sosial xidmətlərinin bir pəncərədən, şəffaf, operativ, vətəndaş məmnunluğuna uyğun göstərilməsinə imkan yaratdığı vurğulanıb.
Nümayəndə heyəti üçün DOST xidmətləri və ölkəmizin sosial sahədə rəqəmsal bacarıqları haqqında təqdimatlar edilib. Keçirilən ikitərəfli görüşdə Anar Əliyev Azərbaycanla Seneqal arasında münasibətlərin qarşılıqlı hörmət və dostluq ruhunda inkişaf etdiyini, əmək və sosial müdafiə sahələrində əlaqələrin genişlənməsi üçün imkanların olduğunu vurğulayıb. Nümayəndə heyətinə Azərbaycan sosial sahədə aparılan islahatlar haqqında məlumat verilib. İslam Əməkdaşlıq Təşkilatının (İƏT) Əmək Mərkəzinin Təşkilata üzv dövlətlər arasında əmək, məşğulluq və sosial müdafiə sahəsində əməkdaşlığın inkişaf etdirilməsi üçün əhəmiyyətli platforma olduğu bildirilir.
DOST beynəlxalq səviyyədə yüksək dəyərləndirildiyi qeyd edilib. Seneqal tərəfinin də DOST konsepsiyasına maraq göstərdiyi diqqət çatdırılıb Əmək münasibətləri, DOST Mərkəzlərinin yaradılması və xidmətlərin rəqəmsallaşdırılması sahəsində təcrübəmizi Seneqal tərəfi ilə bölüşməyə hazır olduğumuz bildirilir. İkitərəfli münasibətlərin davamlı inkişafından məmnunluğunu ifadə edən Mamadou Lamine Diante aparılan islahatlar prosesində iki nazirlik arasında əməkdaşlığın genişləndirilməsində, ardıcıl təcrübə mübadilələrinin aparılmasında maraqlı olduqlarını vurğulayıb.
Görüşdə əmək və məşğulluq, sosial dialoqun inkişafı, sosial xidmətlərin rəqəmsallaşdırılması istiqamətlərində gələcək əməkdaşlıq, bu sahələrdə təcrübə dəyişikliklərinin aparılması, iki nazirlik arasında əməkdaşlığın hüquqi bazasının yaradılması məsələləri müzakirə edilib.
Xülasə — davamını mənbədə oxuyun.
