Şimali Avstraliyada “mütəxəssis” oğurluq hadisələri nəticəsində on minlərlə dollar dəyərində, 800 mindən çox arı oğurlanıb

Avstraliyanın arıçılıq icması, Kvinslendin uzaq şimalındakı bir neçə təsərrüfatdan təxminən bir milyon arının yoxa çıxmasına səbəb olan silsilə heyrətamiz oğurluqlardan sonra çalxalanır.

Ekspertlərin yalnız təcrübəli arıçı tərəfindən həyata keçirilə biləcəyini düşündüyü bu oğurluqlar, arıları məhv edən parazitin son vaxtlar yayılması ilə əlaqəli ola bilər. Cinayət, 30 faizindən çoxu birbaşa bu tozlandırıcılardan asılı olan regional ərzaq istehsalının sağlamlığı ilə bağlı narahatlıqları artırıb.

Regional arıçılar öz arı ailələrinin sayını müəyyən etməyə davam etdikcə, səlahiyyətlilər hələ də dəymiş ziyanın miqyasını qiymətləndirirlər. Keçən həftə 500 000 arının oğurlandığı güman edilirdi; bu həftəsonuna qədər bu rəqəm 800 000-ə çatdı və artmaqda davam edir.

Kommersiya arıçısı Cek Lonton Avstraliya Yayım Korporasiyasının (ABC) əməkdaşı Sofi Consona deyir: "Mən tamamilə məyus oldum, çünki arı pətəklərini yüksək keyfiyyətli, yüksək standartlara uyğun hazırlamaq üçün çoxlu əmək sərf olunur. Normalda arıların olduğu, dolu və sağlam bir pətək gözlədiyiniz halda, [pətəyi] açanda içində heç nəyin olmaması sistem üçün bir növ şokdur".

Zərər çəkmiş arıçılar hesab edirlər ki, arıların öz dəyəri, dayandırılmış bal istehsalı və tozlandırma müqavilələrindən (fermerlərə məhsullarını tozlandırmaq üçün arı ailələrini icarəyə götürməyə imkan verən razılaşmalar) əldə edilən gəlir itkisini nəzərə alsaq, belə cəsarətli oğurluqdan dəyən maliyyə ziyanı on minlərlə dollardır. Bir çox arı Kvinslenddəki avokado təsərrüfatlarında istifadə olunur.

İtirilmiş gəlirin təsirini artıran və oğurlanmış populyasiyaların bərpasını çətinləşdirən digər amil, bölgədə arıları məhv edən parazit - varroa gənəsinin aşkar edilməsidir. 2022-ci ilin iyununda Avstraliya varroanın aşkar edildiyi sonuncu məskunlaşılmış qitə oldu. Cəmi bir ildən bir qədər çox müddət sonra parazit o qədər geniş yayıldı ki, hökumət varroanın yayılmasının qarşısını almaq üçün 100 milyon dollardan çox vəsait xərcləsə də, məhv etmə səylərindən əl çəkdi. Bu qərar əlavə xərcləri və yükü arıçıların üzərinə qoydu.