Türkmənistan və Ukrayna sənaye, tikinti, nəqliyyat, kənd təsərrüfatı, əczaçılıq və texnologiya da daxil olmaqla, ticarət-iqtisadi əməkdaşlığın genişləndirilməsini müzakirə ediblər. Bu barədə Türkmənistanın Ukraynadakı səfirliyinin mətbuat xidməti səfir Toyli Atayevin Ukrayna Ticarət-Sənaye Palatasının prezidenti Gennadi Çijikovla görüşündən sonra məlumat verib. "Tərəflər, həmçinin Ukrayna şirkətlərinin Türkmənistanda perspektivli layihələrdə iştirak imkanlarını müzakirə ediblər", - səfirlikdən bildiriblər. Məlumata görə, ikitərəfli ticarətin inkişafında mühüm amil kimi nəqliyyat və logistikaya xüsusi diqqət yetirilib.
Tərəflər həmçinin qarşılıqlı ticarətin artırılmasının və şirkətlər arasında birbaşa əlaqələrin qurulmasının vacibliyini vurğulayıblar. Atayev 2026-cı ilin sonunadək Türkmənistanda keçirilməsi planlaşdırılan beynəlxalq forumlar, konfranslar və sərgilər barədə Ukrayna tərəfini məlumatlandırıb. Tədbirlərdə investisiya, neft-qaz, energetika, sənaye, tikinti, nəqliyyat, logistika, telekommunikasiya və rəqəmsal texnologiyalar üzrə müzakirələr aparılacaq.
Bundan başqa, görüş zamanı tərəflər Ukrayna şirkətlərinin Türkmənistan bazarında fəaliyyətini davam etdirdiklərini və müxtəlif sektorlarda layihələr həyata keçirmək təcrübəsinə malik olduqlarını qeyd ediblər. Tərəflər, həmçinin maraqlı şirkətlərin iştirak etdiyi videokonfranslar da daxil olmaqla, işgüzar dairələr arasında birbaşa əlaqələrin saxlanmasında Türkmənistan və Ukraynanın ticarət və sənaye palatalarının rolunu vurğuladılar. Tərəflər praktiki əməkdaşlığın genişləndirilməsinə və ikitərəfli ticarət-iqtisadi əlaqələrin möhkəmləndirilməsinə yönəlmiş təmaslar üzərində işi davam etdirmək barədə razılığa gəliblər.
Mənbə: https://www.trend.az/casia/4215975.html © 2026 Trend İnformasiya Agentliyi.
Xülasə — davamını mənbədə oxuyun.
